Тампуш вуӆэң ёх емаң хатӆ кеша уна пелка питам хоятӆув эӆты камтса ясаң понӆув
Вуӆэң ёх рупатайӆ кен антом. Щи рупатайн юраң хоятат рупатӆат. Вуӆы тащ энмаӆтыйн лэнь хоятат хув рупатты ант вератӆат – мохты ныты питӆа маты тащн хоятат ямашк рупатӆат, маты тащн атмашк. Сишн мосаӆ рупатты кашаң хатаӆ, сютчаты хатаӆ, хоты вошатн, щимащ антом. Ипуш кашң таӆ вуӆэң ёх хоятат кеша емаң хатаӆ ӆэщатӆа. Щита вуӆэң ёх сютчаӆат, касӆат, якӆат па ариӆат. Ищипа хотн камтса хоят хащӆ тащ шавиты ураңна. Кимет таӆ пеӆтащӆат, кимет хоят хащӆ тащ шавиты. Щиты щи уӆӆат па рупатӆат. Еӆӆы потар шупевн камтса хоят эӆты ханшӆув, хой морта вуӆы тащ хотатн рупатс па хоӆна щита касӆыман яңхиӆыйӆ. Туняӆ па тампуш ӆув юбилей сэма питам хатӆат поснтасат.
Акулина Петровна Артанзеева ванхатӆап тыӆащ 1947 таӆн сэма питас. Ӆув ащеӆ-антеӆ вуӆы хотан рупатсаңан. Щи порана Воӆаң ун ляльн нох питам юпина хон мувев ураңна хоятат меет ямашк рупатты питсат. Сишн кашаң хоят нётап мосас. Щиты Акулина ашкулая ант манас, хащас анти-ащия нётты.
2022 таӆн ӆув 75 таӆ сэма питам хатӆ па ийкеӆ Филипп Григорьевич пиӆн ияха уӆам 50 таӆ поснтасат. Ӆын ияха ветъяң моӆтас таӆ вуӆы тащ хотан касӆыман яңхсатан. Катңан вет няврэм энмаӆсатан. Няврэмӆаӆ вуӆэң ёх вер еӆӆы туӆат: Юрий – бригадир 3-мет тащн МСП «Мужевское» хоща, Эдуард – пастух 4-мет тащн. Эвеӆ па Горковский тащатн рупатӆ.
Ин Акулина Петровна ийкеӆ пиӆан Ямкуртан уӆӆатан. Ищипа ӆын катра рупатам верӆаӆ ант ёрэмаӆтан, пораян тащ хотэӆа няврэмаӆаӆ хоща яңхӆатан.
Емельян Егорович Пырысев 1952таӆн сэма питас. Опращӆаӆ иты ищи уӆтаӆ хуват вуӆы тащ хотатн яңхас па рупатс. Няӆъяң моӆтас таӆ кат-мет тащан Мужевский совхоз хоща яңхас. Туняӆ унтӆор тыӆащн ӆув 70 таӆ сэма питам юбилей хатӆ поснтас.
Емельян Егорович иймеӆ Таисия Даниловна пиӆн ӆапат няврэм энмаӆсатан (хут эви па йи пох). Айтэӆн няврэмӆаӆ утаӆсаӆы яма па вещкаты уӆты, ханты уӆапса ант ёрэматы па еӆӆы туты. Щиты няврэмӆаӆ опращӆаӆ вер еӆӆы туӆат: Александр похӆ, эвиӆаӆ Вера, Валентина, Надежда, Алена па Светлана ӆув семьяйӆаӆ пиӆн вуӆы хотатн рупатӆат. Ун эвеӆ Фаина ищи вуӆы хотн рупатс, ин па Мужи вошн уӆ.
Ин Емельян Пырысев хоӆна вуӆы хотан яңхаӆ – няврэмӆаӆа нётаӆ па аӆ щиты йи лотан омасты ант вератӆ. Ӆув рупата щирн ар-пуш мойӆапсаятн па ишканщап нэпекатн район па округ ӆоватн эӆты юкантыса. Нэм ветеран ЯНАО тайӆ.
Анатолий Михайлович Талигин 1948 таӆн вуӆы хотан сэма питас. Па щи юпина хоӆна ар таӆ вуӆы хотан вус па рупатс. Ай пора вуш эӆты ӆув вуӆэң ёх рупата яма торӆы уйтӆаӆы. Няӆъяң моӆтас таӆ ӆув 7-мет тащ МСП «Мужевское» хоща рупатс.
Иймеӆ пиӆн вет няврэм вещката энмаӆсатан. Няврэмӆаӆ иса ханты уӆапса па рут ясңеӆ яма уйтӆэӆ. Кат похӆаӆ Игорь па Евгений ащеӆ вер еӆӆы туӆат па Мужевский совхоз хоща рупатӆат. Эвеӆ Лидия ищи щита рупатӆ. Хиӆэӆ Константин вуӆы леккара утаӆтыйс па ищи унащеӆ вер еӆӆы туӆ.
Пенсия этам юпина, Анатолий Михайлович, хуӆ велпасман па рупатыйс. Сишн ӆув аӆ щиты омасты ант вератӆ. Каркам хоят. Ин ӆув Тыӆтам куртаӆн уӆ па щита сютчаӆ. Няврэмӆаӆ па хиӆыӆаӆ ӆув хощаеӆ ван кутан ёхтыӆыӆат.
Тампуш ӆув яӆаптаӆ тыӆащн 75 таӆ юбилей сэма питам хатӆ поснтас. Яма рупатам ураңна район па округев кущайт эӆты ӆув арсыр мойӆапсаятн па ишканщам нэпекатн хойӆыса. Ветеран ЯНАО нэм тайӆ.
Владимир Григорьевич Озелов сэма питас ункер тыӆащ 1947 таӆн. Опращӆаӆ вуӆэң ёх вусат, сишн ӆув щи вер уӆапса юш хуват еӆӆы тусӆы. Туняӆ ӆув 75-таӆ юбилей сэма питам хатӆ поснтас.
Ӆув ашкула етшам юпина мохты вуӆы тащ хота ёхӆы манас. Ащеӆн ай пора вуш эӆты яма утаӆтаса хоты мосаӆ вуӆы тащ шавиты, хоты вуӆэт ияха акатты мосӆат, хоты ӆувеӆаӆ катаӆты па нох кирты. Щи тумпина маты юшат эӆты тащ туты па воштыты, маты нюрмата касаӆты, хоӆща Кев тумпелка уншты па хоӆна ар вер. Щиты 1965 таӆ эӆты Владимир Григорьевич Мужевский совхозн пастуха рупатты питас. Еӆӆы па ӆув 5-мет тащн бригадира рупатс. Яма рупатам ураңна ар-сыр мойӆапсаятн хойӆыса: 1999 таӆ – ветеран ЯНАО, 2003 таӆн – Благодарность Главы МО Шурышкарский район, 2010 – Почётная грамота Районной думы МО Шурышкарский район. Щи тумпина хоӆна па кимет ишканщап нэпекатн мойӆыӆыса.
Пенсия этам юпина ӆув яң таӆ моӆтас шоши вуӆыӆаӆ утча пуңаӆн тайсаӆӆы па шависӆы. Ин па ӆув верӆ еӆӆы туӆ Олег похаӆ. Ӆув МСП «Мужевское» хоща 1-мет тащн рупатӆ. Владимир Григорьевич иймеӆ пиӆн нийӆ няврэм вещката энмаӆсатан. Иса яма утаӆтысат, семьяят тайӆат па рупатӆат. Владимир Григорьевич ин Восяховн уӆ па няврэмӆаӆа нётаӆ хиӆыӆаӆ энмаӆты. Марэматы пораян вуӆы тащ хота ӆэӆапӆ па щита еша сютчаӆ.
Андрей Алексеевич Артеев сэма питас 1957 таӆн Елещ карты юш пуңаӆн. Туняӆ ӆув 65-таӆ юбилей сэма питам хатӆ поснтас. Иса ай пора эӆты ӆув вуӆы тащ пиӆан ванан уӆ. Ащеӆ-антеӆ ищи вуӆэң ёх вусат.
Иймеӆ Любовь Григорьевна пиӆн 1980 таӆ эӆты ияха уӆӆатан па ияха совхоз «Мужевский» хоща пенсия манты унты рупатсаңан. Еша сютчаман юпина па ёхӆы рупатты ханштаӆысайтан. Ант вератӆатан аӆ щиты йи лотан омасты. Иса мосаӆ молты верты. Вуӆы хотан рупата ар. Иса катңан хошӆатан.
Иймеӆ пиӆн вет няврэм энмаӆсатан. Ин няврэмӆаӆ иса уна йисат, семьяят тайӆат. Катңан хиӆыӆаӆ энмаӆты нётӆатан. Ин ӆув юшеӆ еӆӆы туӆ ай похаӆ – Пётр. Щит ащия меет ям хун няврэм аңки-ащи вер еӆӆы туӆ. Оӆаңмет тащ МСП «Мужевское» хота ӆув рупатӆат кашң таӆ нох этаӆ. Ӆув меет ямашк тащеӆ шавиӆэӆ па аршак нёха хорӆат. Щимащ каркам хоятат онтасн вуӆы тащат еӆӆы энамӆат.
