Россия мувев эӆты кашң семья Воӆаң ляль етшаптаты нётсат. Хой рупатсат, ар мур ляля яңхсат, ар хоят щита ӆыӆӆаӆ хайсаӆӆаӆ. Овс мув шоши хоятӆув ищи ар юр версат. Хантэт, вур ёх, охальт па саранат ищи немпщат воштаты яңхсат. Ванты, муң хоятӆув куш рущ ясаң ант уйтсат ищипа ляльсты яңхсат. Ӆув шеек юраң хоятат. Яма веӆпассат, унт хуват яма па шитаман яңхсат. Ӆаварт па карты сам немпщат эӆты ант паӆсат.
Ямал мувевн Всесоюзной перепись щирн 1939 таӆн ветьяң пеӆа хут щорс (46) хоят уӆмаӆ. Няӆ таӆ лялясам сыс муң округев эӆты 8982 хоят китыӆыям. Щи хоятат кутн 500 нэ хоят. Няӆ щорс-кем хоятӆув век кеша мантсат.
Нэңат, мушаң хоятат, ун пиращ хоятат па няврэмат ёӆан такан рупатман вусат. Вой сох акатсат, хуӆ веӆсат, нёхи энмаӆсат па хорсат, нёхи сораӆсат. Па иса муй моӆты мосаӆ иса щи версат ляль сора етшаты кеша. Муң соӆтанӆув ураңна хошам сохат, моӆщаңат, кувщат па тупрат ёнтсат. Ай няврэмиет ищи ар нётапса версат. Муй арат юр тайсат щи арат рых, толх акатсат.
Архив нэпекатн ханшман вус муй арат хуӆ веӆсат. Муң Ямал мувевн 810 щорс центнер хуӆ йиңк эӆты нох шитам. Щит кат-пуш моӆтас аршак хащм 1936-1940 таӆт эӆты. Кавартам хуӆ па нёха карты банкаята ӆартамт. Щит хус миллион моӆтас банка.
Муң кашаң таӆ лялясам ёхӆув, ляль порайн тарма рупатм хоятӆув хорӆаӆ пиӆна «Бессмертный полк» хоща шушсув. Тампуш муң яӆап коронавирус нэмпи муш ураңна щиты шушты ант питӆув. Тампуш яӆап щир – интернета понӆув па кина эӆты ванты па этаӆтаты питӆув. Век кеша ӆув эӆтыӆаӆ нумты питӆув!
