Шимӆаң рут мур хоятат Россия хон мувев ӆоватн нэпека ханщӆаят
Катра, Советский Союз пораян кашң хоят паспортаӆн ханшман вус маты рут хоят пеӆа лудв уӆ. Там йис щи вер ёрэмаса, иса руща йисат. Шимӆаң рут мур хоятӆува, катра йиты, хуӆ веӆты ант рахаӆ, вой веӆты ант рахаӆ, щиты-ки – унта яңхты воӆӆы ант эсаӆӆаюв, мохты штрафн понӆаюв. Ин яӆап нэпек ӆэщатӆа. Щит – федеральный список лиц, относящихся к коренным малочисленным народам РФ. Щи нэпекат сахат мохты ныты питӆа хой наң рут па муй хорпи льготаят наң тайӆан.
– Ма нумастэмн щимащ нэпек верамн шоши Овас мур хоятӆува уӆты кеншак питаӆ. Хоятӆув ямашк уятты питӆат муй хорпи па муй сахат ӆувеӆ нётап рахаӆ. Щи тумпина ант мосаӆ сот-пуш яңхтыя па нэпек акаттыя хуӆ веӆты ураңна па кимет вер сахат, – такан ястаӆ президент Ассоциации коренных малочисленных народов Севера, Сибири и Дальнего Востока РФ Григорий Петрович Ледков.
Тохи ханштаты ураңна мосаӆ заявление ханшты па нотариально заверенный копия свидетельства о рождении вертыя. Хой ант хошаӆ па па моӆты инщасты ӆытӆ, рахӆ Ӆорвоош район Ассоциация «Ямал-потомкам!» хоща ӆоңтыты. Адрес: Мужи воош, Уральская воошхул хот 14А, каб. 305 (хуӆмет ят). Щита нётап верӆа мосты нэпекат акаттыя.
