Владимир Енов
Имоӆтыйн кеӆщи хуӆые уӆ. Ӆор йиңк хуватн ущиӆыйӆ, ӆор йиңк вутатн яңхиӆыйӆ. Моӆты пеӆңа йиңка омасӆ-ки, пеӆңа ёхи ӆавемаӆӆы. Моӆты пиром йиңка ӆатаӆ-ки, щит ищи ёхи ӆавемаӆӆы. Щаӆта мув ӆэр йиңк иӆпийн шияӆаӆ-ки па ёхи вортомтыӆӆы. Щиты хоӆты, таңха, ӆув щи уӆ.
Имоӆты хатаӆн кеӆщи ӆор ова яңхас па щимащ вер моштас: ӆый хуӆаң ӆорэӆ хантэтн варан ӆап тухром.
Щимащ вер моштомаӆ кутн ӆув туп щиты еӆ уваӆтас: «Кай! Муң тата щи мощатӆаюв па ӆор йиңкев эӆты нох таӆӆаюв! Ма-са яңхӆом па мохиӆама щи айкеӆ туӆом». Щитаӆн ӆыяӆн вощемас па ӆор кертман арсыр хуӆата айкеӆ тутыя щи манас.
Хув кут муй ван кут кеӆщи щиты яңхас па хуӆ ёхӆаӆ и тахая щи акатсаӆӆы. Туп-туп няхарӆыман, и пелак эӆты кимет пелка питыӆыман, хуӆат актащты лота куӆ вунш имет ёхатсат, ӆый юпеӆан мохсаңат ущсат, щаӆта щохрат. Пеңкаң сортат, вояң мевты имет, сархат муй пишьянат, ханшаң хуӆат па ай ӆарат хоӆыева, тэрмаӆоман, ияха актащсат. Ӆый кеӆщен тувом воӆаң айкеӆ хуӆанттыя ёхатсат.
Ин кеӆщи мохиӆаӆ еӆпия этас па щиты потартыя питщас:
– Ёх, муң хуӆаң-ӆантаң ӆорэв хантэтн варан ӆап тухром! Еша уӆӆы тата йиңкев нох сортыя питаӆ. Ма щирэман, ин муңева ӆор ова манты мосаӆ па вар иӆтайт ямсыева нох хирты. Туп щи юпийн муң Аса ким эттыя верытӆув!
– Па муң ищиты щи нумасӆув, – арсыр хуӆат ӆувеӆа ёхӆы пеӆа ястаӆат.
Щиканща ин хуӆы тащат ӆор ова щи аратӆат. Ӆор ова ёхатӆат па вантӆат: яна щи ӆый ӆорэӆ варан ӆап тухром.
Щаӆта хуӆат муй арат юр тайӆат щи питщаӆат ӆыйӆаӆн вар иӆпийн мув хирты. Щи хирӆат, щи хирӆат па нэмоӆты вус вертыя ант верытӆат. Щиты йиңкеӆ нёхлаңа йиӆ па нёңхал кутн хуӆаң тащат вар оӆңаң пуната ӆоңӆат па ханты ёх ёшата щи питӆат.
Хун вар пуңӆатан йиңкаӆ сыстама йиӆ, кеӆщи хуӆ ай вусые иӆан моштал па щитаӆ мохты Аса щи манаӆ.
Иса щи вуш эӆты ӆув мохиӆаӆн ӆыкан эттыя питса па полщаң кеӆщия аиӆса. Щимащ вер хуӆман, кеӆщэн хоӆӆаты керӆас па сэмңаӆаӆ иса вуртыя йисңан.
Юхат Туром ащийн щи полщаң вераӆ ураңан ӆув эпӆаң нёхеӆ нох вуса. Щишан Ас хоща уӆты хантэтн кеӆщи хуӆ ӆэваса ант па ӆавантыӆа.
