Роман Ругин
Хун па рых па мурах пошаӆ,
Пиӆңа, пурам оӆңаӆ сохнаӆ,
Уӆы ёхат хося си сысн,
Парас ӆаварт, ёхтас кен сыс.
Хува питам наен, матты
Хув лак кеӆа эсӆаӆм уӆы,
Туп-туп хойӆа сувна, ванты,
Таӆаӆ лэньтан, ёлхат ухӆаӆ.
Тась ёх хося си пораян,
Вериӆыӆа емаң хатаӆ,
Ӆуӆв па, мосаң, си хатаӆан
Сютсяӆ яма оӆаң атаӆ.
Ӆув па, ванты, си еӆпина
Манас кер ек,
Тови няр ек,
Сэм па най ӆапатты пиӆңа,
Хасяс юшаӆн каман нярама.
Сишан, ванты, уӆы ёхӆан
Муйкем арат ёнтам тайӆат,
Пек хул мохты курӆаӆ ворман,
Уваӆтыман катна таӆсӆат.
Ухӆат мохты навармиӆат,
Аӆтуп, ванты, сеӆтамтыӆат,
Тынсяң китӆат ӆонсям сува,
Хой па ӆаям ювтаӆ хува.
Увӆат, няхӆат. Радюв ёнтаӆ,
Оаккаят кутӆаӆ кутап
Аңкартыӆат, ампат нэрсӆат,
Иса тата – унат, аят,
Вешӆаӆ хося иса амат.
Хун па наен паӆ реп ӆоңӆа
Нэрсты питаӆ лыньмам кеӆӆаӆ,
Метшак вояң уӆы хорӆа,
Нови сумат хорпи эӆаӆ.
Хорты кеман ӆаськам анан
Каврам уӆы урен исьӆа,
Хотат кутан манты аран
Самен, матты война иисӆа.
Си арӆанна – потарӆанна
Сясаӆ ям уӆапса кутэӆ,
Ӆуңан иӆ ӆат ӆоңты найна,
Нови юшна ныӆа сюнеӆ.
