Айкер тыӆащ оӆаң хатӆатн ям айкеӆ ёхтас. Овкурт ашкула утаӆтыты нэ Анжелика Вальгамова округев ӆоватан нох питмаӆ Тампуш Ямал мувев ӆоватан касапса «Учитель родного языка Ямала» верыӆыса. Аратӆ округев эӆты хуӆамхосьяң утаӆтыты нэ Пулңавта ёхтыӆымеӆ. Кашң хоят ӆув эӆтэӆ потармаӆ, мастер-классат этаӆтамеӆ па па кимет хошты верта ӆэщатмеӆ.
Ӆорвош районэв эӆты кат хоят яңхмеӆ, щит: Анжелика Вальгамова – ханты ясаң утаӆтыты нэ па Ульяна Свалова – саран ясаң утаӆтыты нэ. Щи касапсаян хуӆам хоят нох питмеӆ. Анжелика Роальдовна ищи щи кутатн. Сишн ӆув хоӆна еӆӆы еша па утаӆтыйӆ. Па па ипуш ӆувеӆ мосаӆ этаӆтыты. Щаӆта ныты питӆа хой Ямал мувев эӆты Россия хон мувев ӆоватан еӆӆы кастыя манаӆ.
Анжелика Роальдовна Овкурт ашкула-интернатан рупатӆ. Ӆув ищи щи ашкулайн утаӆтыйс. Щаӆта еӆӆы ӆув Ёмвошн таӆаң хут таӆ утаӆтыйс па утаӆтыты нэңа этас. Тампуш яң таӆа ванамаӆ хоты ӆув ашкулайн рупатӆ. Туняӆ эӆты ӆув ханты ясңа няврэмат утаӆтыты питас. Щи еӆпи айшак няврэмат утаӆтас. Рут ясңаӆ шеек самаңа тайӆаӆы па еӆӆы туӆӆы.
