Щиты тащ хотан энамты няврэмиет ястаӆат
Ӆорвош районэв ӆоватан уӆ проект «Сезонный кочевой детский сад – школа». Щи щирн няврэмат пиӆан рупатты нэ – Наталья Терентьевна Возелова Кев тумпелка яңхас. Уйтӆор тыӆащн ӆув Горковский сельхозпредприятие тащатн уӆмаӆ. Щит Мохсар рутат уӆӆат. Ӆув тохи карты юш хуват поездан манас па щита рутӆаӆн хот унты навраӆса.
Щиты ӆув кашаң хатаӆ нявремиет пиӆан рупатас. Няврэмат утаӆсат ханшты юх ёшан катаӆты. Оӆаң хатаӆн ӆув хорам хорт ханшсат па ӆэщатсат. Кимет хатӆатн ӆув умащ монсят хуӆантсат. Каман навратӆисат па ям ёнтапсаятн ёнтсат.
Хой няврэмат тампуш веӆщи ашкуӆая манӆат ӆув пиӆаӆн Наталья Терентьевна буквайт утаӆтасат, ӆуңатты юр поныӆысат. Хой хоты веритас щиты ӆуңтас, хой ёшн, хой юх щелматн.
Антиӆал па ащиӆаӆ пиӆан утаӆтыты нэ ищи потремияс па ястас хоты няврэм пиӆан мосаӆ буквай утаӆтыты па ӆуңатты. Муй мосаӆ няврэма уятты там таӆ ӆоватан, муй мосаӆ верты.
Меет оӆаңн тамиты утаӆтыты нэңат хуӆ веӆпасты ёх няврэмат хоща яңхты питсат, щит Хашкурта, Ямкурта па Ёханова. Ӆапатн ӆув хуӆампуш няврэмат пиӆан уйтантысат. Няврэмат пиӆан шоши ясаңан потарӆат, сишн ӆув сора утаӆтыты нэ пеӆа хуӆанты питӆат. Меет оӆаң няврэмат тамщ кочевой детский сад вет няврэм етшаптасат 2013 таӆн. Щи щир эӆты нумас понтса ӆуң-сыс Кев пеӆа вуӆэң ёх няврэмат утаӆтаты яңхты. Сишн няврэмат ашкуӆая манты пора кеша ошаңшака йиӆат.
Ханты лопас ӆэсятас Иван Сандрин. Хорт масат Зинаида Лонгортова, Наталья Возелова, Алексей Конев, Лариса Жаринова па информационно-аналитическое управление администрации МО Шурышкарский район.
