Вуӆы тащ хотатн рупатты ёх яма тови сыс улмеӆ па суюв омпсам юпина мохты Кемтумпелка касаӆмеӆ
Кашң таӆ вуӆэң хоятат тащӆаӆ пиӆн Кев пеӆа касаӆӆат. Ӆуң пораян тата унт ӆыпиян руваң па тэӆыя нипируват па пеӆңаят торас верӆат. Сишн ӆуң сыс Кевтумпелакн кев питаратн тащ шавиты шеек ям. Ёлах вотрув яңхаӆ, ун юх па паӆ тораң антом. Вуӆэта умащ. Руваңшака йиӆ – нохӆышк кева хуңӆат.
Вунщ тыӆащн Кев эӆты ёхтас Константин Игоревич Талигин. Ӆув энамты ёх. Ашкуӆа етшам юпина мохты Пуӆңавта зоотехника утаӆтыты манас. Щи етшам юпина ӆув 2-мет тащан сельхозпредприятие Мужевское хоща вуӆы леккара рупатты питас. Конторая ёхтас нэпеклаӆ щира ӆэщатты па кущаята потарты хоты товеӆ манас.
– Тащэв шек ун антом. Кат хот туп, па хуӆам семья. Аратаӆ няӆ пастух рупатӆат. Щит шимаӆшак. Хоятӆув сютчаты кум ант шитӆат. Сишн ма па тащ шавиты яңхиӆыӆам. Щи тумпина ма леккар рупатаем верӆэм. Нэпека иса муй мосаӆ ханшӆам, – потарӆ Константин Игоревич. – Товев морт-кем ус. Ийңк ар этас. Суюв омасты пораян хатӆат роман руваңа ювемаӆат па атаӆн ищкия ийӆ. Кер-сох этӆыяс. Роман вотаса па ювемияс. Сишн суювӆув еша тапсат, то омайӆаӆн вощкиӆаят, то унт войт ӆоӆмасты ёхтыӆысат.
Кевтумпелка Унщ тыӆащ оӆаңн питсув. Ин ӆуңев ям, шек руваң антом. Нумастэмн, туняӆ арат суюв энмаӆӆув. Па ищи туняӆ арат хортыя маӆув. Кемтумпелакн муң раойнэв эӆты Горковский сельхозпредприятие тащат ищи ӆойӆат. Ӆув тащӆаӆ Янас Кев лепн тайӆыӆаӆ. Щита ям, ёлах вотрув хойӆыяӆ. Карты юш станцияят унты ван. Рахаӆ ӆапкая яӆап ӆэтот унты ӆэӆамтыты. Щита хоӆна сотовый связь яма уӆ. Энамты ёх пастухат телефон хуват айкеӆат рутӆаӆ хоща китӆат. Па каш верман кева нох хуңхман интернет эӆты мир айкеӆат ӆуңатӆат па вантӆат. Щиты, Василий Максаров шеек ям умащ вантыя хор китас. Муң ӆувеӆ тата ханты лопса понӆэв. Вантаӆн. Па тащн вуӆты хоятӆува тумтака рупатты па тащӆаӆ шавитыя.
