Там ванан яӆап таӆ еӆпина ищки икев пиӆна Мужи воошна уйтантысув
Ямал Ири – щит муң Ямал мувевн уӆты ищки ики. Ястаӆат ӆув сэма питмаӆ хун Ямал мувев па Кев урт этсат. Щи эӆты ӆув уӆ ищки мувевн па хоята нётаӆ. Ӆув ям ӆуңхатн шавиӆа. Сэма питмам хатаӆаӆ ӆуңатӆа – Ас потты тыӆащ 28 хатӆ эӆты. Ӆув арпелк-сыс уӆ ӆув курталӆн. Курт нэм – Горнокнязевск. Щита ӆув вуӆыӆаӆ шавияӆ па хуӆ веӆты яңхаӆ. Аӆ хоятат иты уӆ. Щи куртаӆн ӆув кашң ёхтам хоят самаңа ӆаваӆӆаӆы па хой ёхатаӆ яма мойӆаптаӆы. Ӆув ям хощам сохат таяӆ. Карты хорпи ищкиян ӆув ант потыӆыӆа. Патан иса соңхэп тайӆ. Щи юхӆ ӆувеӆ шеек нётап вераӆ, рущ щирн-ки ястаты «палочка-выручалочка». Щи тумпина ӆув ай куйп патан тайӆ. Щи от пиӆн ӆув шепанӆыты омасӆыйӆ. Шепанӆыты ӆув яма хошаӆ. Шепанӆаӆ иса уӆты мира па хоята нётап туӆат. Ямал мувев хуват ӆув вуӆэң ухаӆн яңхаӆ. Ин па яӆап щират ёхатсат. Ин ӆув ун машна шуп тайӆ, нэмӆ – трэкол. Щи машная ӆув вератӆ аршак мойӆапса понты няврэмат ураңна. Ямал мувев шеек ун, сишн ар мосаӆ яңхтыя. Хун вуӆыӆ метӆат, ӆув трэколан яңхиӆыяӆ.
Там пуш ӆув па Ямал мувев ӆап ӆаратты питсаӆӆы. Таӆаң тыӆащ ӆув ты-тохи яңхаӆ куртат кутан па няврэмата каш вераӆ. Ӆув няврэматн шеек ӆаваӆӆа па щи кеша ӆув ӆуңтарат утаӆтаӆат. Щаӆта щи утаӆтам отат Ямал Ирия потарӆат, ӆув щи кеша ар мойӆапса, ёнты отат па мампащат сопасӆымаӆ. Сишн няврэмат ӆувеӆ самаңа ӆаваӆӆэӆ. Ӆув муң районэва хуув ант ёхтыӆыяс.
– Ма сэма питам мувем щит Ӆорвош район. Туңашк-ки ястаты щит ай куртые – Ямкурт – щита ма сэма питсам, – ястаӆ Герман Романович Сандрин. – Уна йиты питсам па нумасӆам няврэмата умащ ма верты хошӆам. Рупатаеман роман «ищки ики» каншты питса. Па ма пеӆаема аңкармасат, ясталат – наң щи «ищки ики». Щиты ма Ямал Ирин эм тайты питсам. Ма рут мувевн Ямал Икия аяйӆӆаям. Рупатаем шеек самаңа тайӆэм. Шеек самеман ям хун няврэмат амтамтыӆат. Няврэма-ки ям – манэм ищи ям! Яӆап таӆн тумтака уӆаты! Ояңа уӆаты! Еӆӆы уӆапсаев туваты! Яӆап, 2022 таӆ пиӆан!
