Дзоля, но зэй водзмӧстчысь – Алёна Соломатова
Кос кылӧн кӧ шуны: Алёналы дас нёль ар, бураа велӧдчӧ 8-ӧд класстын, олӧ Мыжыын, радейтӧ коми кыы да тышкасьны. Но кор том морт олӧм вылӧ видзӧдӧ окотаӧн да пась синмӧн – коса шуны оз позь.
Ме зэй радейта сэтшӧм йӧз, топ нинӧм порысь либӧ том, кодъяс зэй мэдӧныс ооны, зэй мэдӧныс висьтооны, зэй мэдӧныс тӧдны. Кодъяс никор оз водьсооныс и никор оз шуныс мыйсюрӧ, а пыр ӧзйӧныс, ӧзйӧныс, ӧзйӧныс! Сiдз позе висьтооны и Алёна помлась.
Котыр. Мамыс – Наталья Фёдоровна, айыс – Владимир Александрович, ыжыд чой – Света, дзоля вокыс – Вова. Ачис Алёна шӧркос ныы. «Медча шӧр менум олӧмын – семьяӧ. Ми зэй радейтам ветлооны ӧтлаын вӧрӧ шойчан лунъяссӧ, а рӧштвоӧ чукартам став рэднумес и празднуйтам. Радейтам выль воӧ ӧтлаын лепитны пельмень. Неважен миян семьяӧн артмис выль традиция – ми быд рыт лыддьысям. Чукартчам ужинайтӧм бӧрын и маме аслас лӧнь, небыд, мича гӧлӧснас миян лыддьӧ. Ми гижим неыжыд список, мый ми мӧдам лыддьыны и сы кузя мунам» – юксе миянкӧд Алёна.
Велӧдчӧм. Школаын Алёна велӧдчӧ бура, но шуӧ, мый некымын предмет кузя сылын сулалӧ четвертьын нёль: «Ме мӧда лоны отличницаӧн и ӧнi зэй старайтча велӧдчыны куш витъяс вылӧ». Медча радейтана велӧдӧм миян ёртлӧн – литература. Алёна шуӧ, мый лыддьӧ ставсӧ, мый сюрӧ кийӧ: «Миян роч кыы да литератураӧ велӧдысь, Наталья Ивановна, шуис, мый колӧ лыддьыны ставсӧ. Вед миян ставыс вермас коомысьны. Ме сiдз и кара, ог вед тӧд, кор и кутшӧм дум менум ортсалас. Медча радейтана гижӧдъяс Аркадий Гайдарлӧн «Чук и Гек» да Антуан де Сент-Экзюперилӧн «Маленький принц». Ныа зэй кокнидӧсь, но ме быд во ные лыддя и быд во аддза мыйкӧ выльӧс сэн».
Волонтёралӧм. Кор Алёналы вӧлӧма сизим ар, Света чойыс кучема нолӧдлыны сыйӧ музейӧ, кытӧн Света вӧлӧма волонтёрӧн. «Ме воа музейӧ, – казьтылӧ ныы, – и воща нылысь корны сетны менум ортсасьны нылы. Кык во ме прӧстӧ ветлалi ортсаси, бӧрвы менум сетiсныс волонтёр удостоверение». Водз музей ортсасьысьяссӧ чукартiс Мария Кузнецова. Ныа чукарӧн музейын нуӧдiныс экскурсияяс, мастер-классъяс, гажъяс. Ветлӧмась больничаӧ челядьяс дорӧ – ру кыпӧдны, пӧрысьяслы керкаӧ ва ноллӧмась. «Менум волонтёралӧмыс сетӧ кыпыд ру, тӧдӧмлунъяс да кужӧмъяс. Миян музейын ме тӧда пӧшти став экспонатсӧ. Медча радейтана – шаманъяслӧн паськӧм. Менум тайӧс зэй дельнӧй тӧдны. Нэшта на, ме коркӧ висьтоолi сиамскӧй близнецъяс помлась. И сы бӧрын быдсяма патология темаыс менум лоис зэй дельнӧй. ӧнi уна лыддя сы кузя. Зэйджык ме мэда ортсасьны кань-понъяслы – Мыжыын татшӧм позянлуныс абу» – юксе Алёна.
Тышкасьӧм. Кор Алёна вӧлi мӧд класстын, аддзӧма ӧшалӧ гижӧдтор: «Корам кудо секция вылӧ». Зонёртъяс шуӧмась: «Кудо – тайӧ тышкасьны». Алёна локтӧма айыс дорӧ да корӧма гижӧдны Андрей Владимирович Конев дорӧ. Ветлӧма тышкасьӧм вылӧ квайт во: «Менум лэсялiс сэтчӧ ветлооны, мыля локтан лёк руӧн, а тренировка дырйи став лёкыс петӧ. Мунан керкаӧ люмъялiгмоз нин. Ме ӧнi ог ветлы сэтчӧ, киӧс дойдi и формаӧ лёккойд, но зэй мэда пырӧдчыны бӧр».
Сцена вылын ворсӧм. Тайӧ медча радейтана Алёнаӧн делӧ. Медводз классянь велӧдысьяс казялӧмась, мый Алёна бура висьтоолӧ кывбуръяс и вощемась корны петкӧдчӧмъяс вылӧ. Вэлян-вэлян и миян ёрт лоис школаса концертъяс вылын ведущейӧн. Нӧшта Алёналы зэй лэсялӧныс бальнӧй йӧктӧмъяс. И унаысь пробуйтӧма ныы ветлооны сэтчӧ, но йӧктыны мэдӧ неуна зон. Йӧктан гоз дыр кежлӧ из аддзысь и колисныс тайӧ йӧктӧмъясыс куш сьӧлӧмын. Но миян ёрт оз печалитчи, тӧдӧ, мый коркӧ артмас пыртны тайӧс олӧмӧ.
Кытчӧ бы ин кор Алёнаӧс участвуйтны, сыа пыр радпырысь вӧзйысьӧ и бураа асьсӧ петкӧдлӧ.
Коми культура да кыы. Нёль арсянь нин, Александра Васильевна бабыс кучема нолӧдлыны коми керкаӧ, гажъяс да фестивальяс вылӧ. «Кэн вӧлi бабе, сэн и ме. Ог пэмнит медводз коми паськӧм пасьталӧмсӧ, но пэмнита, кудз мӧд по «Чужан войтыр» вылӧ сюри. Менум зэй лэсялiсныс югыд, мича изьватас сарафан. Вӧлi зэй жар лун. Ми сьылiм, йӧктiм, хоровод нуӧдiм. Вои керкаӧ кокъяссӧ, мыдзӧмысь, дойменыс, а люм чужӧмысь оз мын» – люмъялiгмоз казьтылi Алёна. Сыа велӧдӧ школаын да Александра бабыскӧд коми кыы. Шуӧ, мый сылы кылыс колӧ аслыс и сьӧлӧм вылӧ воӧ. Пэнимайтӧ, но оз на вермы вочавидзны. И сыйӧн, мед бурджыка велӧдны мам кыысӧ, Алёна пырӧдчис Мыжыса телеканалӧ нуӧдны челядь программа коми кыылӧн. Карӧмась на токо медводз шагъяс таын, но став сьӧлӧмсянь кӧсъям Алёналы, мед ставыс артмас. Мед юргас изьватас кыы Ямал му вылын челядьсянь!
