Ямалса 5-ӧд класстын велӧдчысьяслы петас велӧдчан небӧг

Февраль тэлысь. Мыжиысь Ирина Гавриловна юасьӧ онлайн-звонокӧн:

– Привет! Мыйнӧ каран?
– Гарри Поттерэс тай лыддя. И тэн привет.
– И кудз тэн?
Дамблдор, меша, кулic, да гажтэм лои.
– Лыддьысян сiдзкӧ. А ачыд книга гижны он мэд?

Ираыдлы разнӧй завиральнӧй думъяс ме помлась юрас волалэлӧныс: то топ- модельӧ менӧ ыстӧ, то артистӧ.

ӧнi, думайтча, писатель кад воис.

– Тэ на перспективу юасян или конкретнэй предложение выйым? – осторожнӧя вочавидза.
– Конкретнӧй.

Тасянь сэсся ставыс и мунic.

Пара во сайын Ямалын вощисныс лӧcьӧдны школаяслы яран, эсьтяк, селькуп да коми кылысь велӧдчан небӧгъяс.

Коми небӧгъясыс петӧныс изьва сернисикасӧн.

– 1-4 классъясыслы книгаясыс гижӧмаӧсь, – висьталic менум Ираыд, – а вот витӧд класссӧ велӧдны диалектическӧй материалыс абу. Ми кучам гижны 5-ӧд класслы книгасӧ. Мэдан миянкӧд?
– Вошйылам, – вочавидзи.

Вот, меша, кудз проблемаяссӧ колӧ радикальнӧя решайтны. Велӧднытӧ небӧгыд абу – гижам.

Медча пым гижан кадыс веськалic «короннӧй» кад вылӧ (март-май), сэсся мунic помтӧм правкаяслӧн кад. Кымынысь эськӧ гижӧдтӧ он видзӧдлы – век мыйкӧ лӧсьӧдны окота. И токо ӧнi, тӧӧ матыстчан кадӧ, уджнум воис финишлань. Серпасасьысьяс дасьтiсныс дизайнcӧ.

Вочавидза нылы, кодъяс радейтӧны горзыны «Изьваса сепаратистъяс! Мый вылӧ лӧсьӧдны диалектическӧй небӧгъяс? Мый лоӧ, став диалектлӧн кӧ аслас велӧдчан небӧг лоӧ?».

ӧти-кӧ. Кодлы тайӧ небӧгыс? Ямаллы. Тӧда, мый 1-4 классъяслы небӧгъяс серти велӧдчӧны и Нарьян-марса изьватас. Ог тӧд, эмӧcь-ӧ Кола кӧджын коми кыв кружокъяс, но нылы эськӧ тайӧ материалъясыс лӧcялicныс жӧ.

Изьва районын велӧдчысьяс тайӧ небӧгъяс серти велӧдчыны оз кучиныс, сы вӧcна мый эмӧcь стандарт серти урчитӧм гижӧд кыла велӧдчан небӧгъяс.

Мӧд-кӧ. Ми, Изьва районсаяс, гортын сёрнитам сёрнисикасӧн, а школаын, позьӧ шуны, босьтам гижӧд кылысь содтӧд тӧдӧмлунъяс. Урал сайӧ мунӧм изьватаслӧн ситуацияыс мӧдджык. Верстьӧяс бара на гӧгӧpвoӧныс да сёрнитыштӧныс кыынас (ӧсёрнисикаснас). Дзоляджыкъяс кыысӧ пӧшти некод нин оз тӧдныс. Ныа ай- мам кыытӧ вощеныс велӧдны кудз иностраннӧй.

И тан Тургеневӧн на лэптӧм отцы да дети костын конфликт вермӧ вуджны вербальнӧй тшупӧд вылӧ. Челядьыд кӧ ай-мамыслы кучас шуны «мӧда карны» пыдди «кӧcъя вӧчны», гӧгӧрвоасны-ӧ ciйӧc? Чайта да, оз. (Ай-мамыс, дед- бабыс гижӧда комитӧ некӧн некор из велӧдлыныс, Коми Республикаӧ из волыныс).

Артмӧ, мый челядь кыысӧ велӧдӧ, мед сёрнитны бытӧвӧй тшупӧдын.

Менчум керкаясӧc эськӧ зэй жӧ чуймӧдас ме кӧ нылы «ульйоола мӧда воедлыны» пыдди шуа «йӧвла кӧcъя котӧртлыны».

Коймӧд-кӧ. Небӧгас сёрнисикасыс оз петкӧдлыссьы гижӧда кыы пыдди. Сэн ми орччӧдiм сёрнисикаса да гижӧда кывъяслысь торъялӧмъяссӧ. Шуам: г.к. менЫм – из. менУм, г.к. кыв – из. кыы, г.к. зорӧд – из. сабри – стог да с.в.

Челядьыс сёрнисикас пыр тӧдмасясныс гижӧда кывкӧд.

Нёльӧд-кӧ. Небӧгсӧ думыштӧма лӧcьӧдны этнокультурнӧй материал вылын: изьватаслӧн Урал сайӧ мунан туйыс, кӧp видзӧм, чомйын олӧм, паськӧм ноолӧм, кыйсьӧм-вӧpалӧм, кӧра батальонъяслӧн Ыджыд Вермӧмӧ пай пуктӧм. Диалектыд тайӧ ӧд абу куш кыытӧ шуан – да гижанногыд, тайӧ и ыджыд кыввор (лексика) пай. А кывворыд тан зэй торъялӧ гижӧда кылысь.

Тэднин, кор висьтоола небӧгъяс помлась, быть колӧ шуны идейнӧй вдохновитель да шӧp автор помлась. Тайӧ Наталья Дмитриевна Рочева – Овгортын олысь изьватас ань, код некымын дас во велӧдіс школаын дзоля классъяс. Торъя нин нуӧдліс и математика, и шахмат кружок. Ас помласьыс шуӧ, мый стӧч наукаясыс сылы матынджыкӧсь.

– Ме ог мэд, мед кылыс вошас. Код нэ карас, ог кӧ ми? Колӧ карны, – вочавидзис сiйӧ, кор ме юалi, мый ышӧдic аньӧc рэбитны лингвистическӧй небӧгъяс вылын.

Ирина Гавриловналӧн мотивация помлась висьталi нин: челядьӧc велӧдны колӧ, a материалыс абу. Менам мотивацияӧ мед кольӧ гусяӧн – сiйӧ абу ышӧдана.

Пом пыдди шуа: мед эськӧ челядь котраласны йӧвла да войласны ульйоола, мед отсаласны вӧчны зорӧд да карны сабри. А оз кӧ кӧcйыны, мед та помлась кужасны юӧpтны ай-мам кылӧн.

Ирина Терентьева, изьва район.