Ляль эӆты ханшӆат

Ун Ляль нох питам хатӆ эӆты кашң хоят уятӆ па хой хоятат щи эӆты арт па ӆуңтарт ханшӆат. Ляль щи арат ӆаварт па шук тувмаӆ. Щи пораят эӆты ар потрат ханшман уӆӆат. Муң шоши ханты хоятӆув щи эӆты ищи ханшӆат

Катюша ар

Яблонь лыптат, груша лыптат похсат
Ас хуват шуваң пошмат мантсат.
Каӆнаңаӆа этӆыяс Катюша,
Руваяңаң паӆаӆ саңхама.

Этӆыяс па араӆ арэмисӆы
Степь мувеӆ хопшат курак эӆты,
Ӆув самма ям хорам похаӆ эӆты,
Письмайӆаӆ шавимаӆ ху эӆты.

Ой, наң арэм, эвийе, арыем
Пурӆа наң саңки най юпина
Па сяӆта па ляляң ху хосяя
Катюш эӆты пайм уӆам тува.

Лув ант нумман нэңиеӆ тайӆаӆӆы,
Ӆув ат хуӆаӆ хоты арыяӆ,
Ӆув ат муваӆ самаңа шавияӆ,
Катюшайӆ лувеӆ ант ёрэмаӆ.

Геннадий Кельчин ханты ясңа кератсаӆӆы.

Ляль номас

Нопсэм хося хасяс манам лялен,
Нэмоӆтына нох ат уӆэн ӆувеӆ.
Юха сэврам нюлам иты, самемн
Мортаң ишна кашеӆ сита хувӆаӆ.
Сяӆта хувӆаӆ хохар нянь пулатна,
Асем-аңкем нох актыӆымаӆна.
Хон ӆыпина каши пеӆантапсайн,
Нопса ёхтаӆ, хун шек ӆэты ӆытӆайм.
Потам мувна ма еӆпемна омасӆ.
Патлам сусан, хун ма веӆпасӆысам,
Потам ек икн ӆуй сам хуват холатӆ,
Хун ма таӆан хоӆап вантыӆысам.
Нопса ёхтаӆ хомнамтам ёшпатна,
Хун муң атаң-хатаӆ ӆоваӆтысув,
Сяӆта метам, сясьӆы питам шашна,
Матты юха си сыс ювиӆысув.
Нумаӆмаӆӆы аңкем хоӆӆапсана,
Хун ӆув парам похаӆ ёхтас нэпек,
Ат оӆӆиям ар сыс оӆамӆамна,
Ракнытаӆна, матты рыйты сэсна.
Нумасысув – век ат веритӆув муң,
Туп муң хутӆи нох киӆтысыв ӆуңн.
Мет па кинься нопса аймас века
Муң рупитты ёхӆувн, хой па нёхас,
Рахаӆ айӆты кашаң хоят меңка,
Ӆаптам ун муң мувев ситы вохас.

***

Кимет похаӆ соӆтан пеӆа
Манам сысан аңкем хоӆӆас,
Охшам сыӆна муңхас сэмӆаӆ,
Хун ӆув похаӆ сохат понас.
Лялен сохнам эӆты сикуш
Мувем хося манас кат таӆ,
Яма уятсаӆӆы ин куш,
Антам похаӆ ляля манаӆ
Туп ма аңкем самаӆ хося
Парам похаӆ нюлмаӆ хоӆна
Пелак оӆас, кашийн хонсяс,
Урна посмемиям воӆаӆ.
– Муй сирн ат па хоӆӆатыя, –
Нюхмиӆыяс асем пеӆа, –
Хун ма оӆаң похем шияӆ
Самем хося интапн пеӆаӆ.
Хойна ватса – еӆ юш патлам,
Ляль муй этаӆ, муй па антам,
Туп си яӆап ляль ёх сыеӆ
Аңки самат оӆңа сыемӆ.
Ай ма усам си порана,
Самна каши иси хасяс,
Туп си аңкем ясаң ранаӆ
Яӆап нопсат еӆӆы ястас.
Похем соӆтан пеӆа манман,
Аңкеӆ ин куш аматӆияӆ,
Туп ма сэмӆаӆ пеӆа ватман,
Мор кутн ӆуңтаӆам аңкем шияӆ…