Там вер ям хув йисн парас. Щи порайн халэв икен па хаңхра имен ӆый кутэӆн иса лухсаңа усңан. Ӆуңатн ӆын ияха унтатн муй йиңкатн китомтак яңхсаңан па пурӆыӆысңан. Халэв икен щи сысан хуӆ веӆпасӆас. Хаңхра имен па ӆухсаӆ ураңн арсыр веӆпас пормасат яма ӆэщатас па сором юх эӆты шеңк кен па ӆащкам ай хопат верас.
Ищкия йиты кемн халэв икен морты мува манаӆ, хаңхра имен па овас муваӆн щиты щи хащаӆ. Товийн ӆухасңан, ванта, яӆпа ияха уйтантӆаңан.
Имоӆты сус хатаӆн, морты мува манты еӆпийн, халэв икен хаңхра нэңаӆа щиты щи ястаӆ:
– Ма ёхаттэм ям унты, наң аршак сохом пун щаха веӆпас ураңн сэва!
Хаңхра имен ёхӆы пеӆа потартыйӆ:
– Щит хоты сэвӆом, сэвӆом, щит хоты верӆом, верӆом!
Щитаӆн ин халэв икен морты мува щи манаӆ.
Щиканща сусаӆ параӆ, таӆаӆ параӆ. Туп хаңхра имен ант па тэрмаӆаӆ сохом пун сэвты. И вер па хатӆ эӆты па хатӆа понӆаӆы. Аӆаң сахат вуш эӆты етная, па етна эӆты аӆңа сохом сэвты рупатайӆаӆ хайӆаӆы.
Щиты щи товия йис. Мув кератман ӆоньщат ӆоӆасат па Ас йеңкат иса щи нопатсайт. Щи порайн хаңхра имен, тэрмаӆоман, иӆэм сохом пун сора-сора сэвомтас па щитаӆ ун уңхаң путаӆа лукемасӆы.
Еша уӆӆы тэваң тови хатаӆн халэв икен ёхтас па ӆухас нэңаӆ щиты щи иньщасӆаӆы:
– Я муй, ар сохом версан ма яңхтэм сыс эӆты?
Хаңхра имен ун уңхаң путаӆ эӆты туп и сохом пунаӆ сора лакемаӆ, нох вощкаӆӆы па щиты ел уваӆтыйӆ:
– Оӆаң пунэм тата щиева!
Кимет пун ӆэраӆ лакемаӆ, нох вощкаӆ па щиты еӆ уваӆтыйӆ:
– Кимет пунэм тата щиева! Хуӆмет пун ӆэр лакемаӆ, нох вощкаӆ па щиты еӆ уваӆтыйӆ:
– Хуӆмет пунэм тата щиева!
Щиканща халэв икен ӆув няӆмаң вераӆ моштасӆы, ӆикаӆ ёхтас па ин хаңхрайӆ такан охпатаӆ эӆты хатщасӆы. Щи ураңн хаңхра имен охаӆ имохты вуран этас.
Иса щи вуш элты хаңхраен охаӆ хоща хорамаң вурты юшие тайты питщас па щитаӆ эӆты мет хорасаң тохӆаң воя йис.
Халэв икен па, ӆув юканаӆ хоӆпат муй хопат ант тайман, иса щи вуш эӆты хоятат веӆпасат эӆты хуӆ ӆоӆомтыя питас.
Леонид Лар вером хор.
