Сот хус-кем арат няврэм ашкула-интернататн утаӆтыты вер тайӆат. Арпелкаӆ ёхатсат утаӆтыты тахаята
Аратӆ няврэмат ӆуңтамн уӆӆат ай веӆпасты куртатн па вуӆэң тащ хотатн. Ӆуң-сыс ӆув аңки-ащи хоща нётсат па сютчасат. Хой аңки тыхаӆ эӆты пуңӆа манты уратаӆ? Па хоты верты, еӆӆы утаӆтыты ищи мосал. Там йис уӆапса щиты керӆас, ант-ки утаӆтыӆан – ёхи хащӆан!
Хой вуӆы тащ хотат шеек хуван ӆойӆат, щи тахаята вертолет хоӆна ант яңхас. Щаня пеӆа уӆты тащ хотатн няврэмат хоӆна ант ёхатсат. Пора йи хащӆ. Вертолет хоӆна ант маӆа. Пуӆңаватан ӆавӆасаӆ местаят уйтты хоят, ӆув алял хота вуӆэң ёх хотӆаӆ ӆойӆат. Ешауӆ кат ӆапта ванамӆ хоты ӆув щита ӆавӆасаӆ. Мосаң туром атом, мосаң вертолет шимаӆ, мосаң кущаят нэпекат ювра ӆэщат-сат… хой вантас.
– Тампуш муң отпускан уӆӆув, намн сютчиӆув. Мужи вошн хот тайӆув. Хот верӆув ӆэщатӆув. Нэпекӆув туңа-щира кертӆув. Ай вер теӆыя, – потарӆат имеңан-икеңан Надежда па Евгений Талигины. – Няврэмӆув, кат эвиӆув Васьёханов ашкуӆа-интернатан утаӆтыӆңан. Похэв хоӆна ай, ӆув папуш ашкуӆая манаӆ. Ин эвиңаӆув хопан утаӆтыты тусӆув. Муң ай уӆамн ищиты ащиӆувн тутӆысаюв. Хой пораян вертолетан хот эӆты мохты Овкурт унты тутӆысаюв.
Хой вуӆы тащ хотат карты юш пуңаӆн ӆойӆат ӆув няврэмӆаӆ поездан туӆат. Щаӆта воӆӆы ашкуӆа унты туӆӆаӆ. Кашң ун хоят ӆув няврэмӆаӆ ӆув туӆӆы. Моӆхашк, 10-15 таӆ хащамн, кашң тащ эӆты вуӆы леккар нэман охн митаӆыса па ӆув нэман няврэмат ияха акатӆыяс па ашкуӆа унты ватаӆтыман тутӆыяс. Ин па щимащ щир ант рахаӆ, ант эсаӆӆа. Сишн хой хоты веритаӆ щиты няврэмӆаӆ утаӆтыты туӆ.
– Ма кат похңаӆам кинтак ашкуӆая яңхӆатан. Уншак отэм, Мирослав – 4-мет классан, айшак, Макарик – 2 класса манаӆ. Муң щи ӆаваӆсув вертолет, щи ӆаваӆсув, нэмоӆты антом. Пора хащаӆ. Муң кат-мет тащэв еша хуваншак оӆаң-мет тащ эӆты ӆойӆ па ищипа карты юш унты рахаӆ ёхатты. Сишн муң актащисув па вуӆэң ухаӆн Горняк нэмпи катра станция унты ӆэӆапсув. Уншак няврэмат курн шушсат. Щиты таӆаң хатӆ йисув, – ястаӆ Зинаида Пырысева. – Сус пораян ертат шошиӆат па Горняк пуңаӆн Уса нэмпи ёханаӆ эпатмаӆ. Резьна хопа омассув, вуӆы кара ярсащьсув па щиты щи айнайн ёханэв унщсэв. Паӆщам, самем хошиман уншсам, йиңк пеӆа ант вантсам, паӆӆам. Щаӆта еӆӆы куран шушсув таӆаң ӆапат километра карты юш, Сивая Маска нэмпи станция, унты. Щита туп поезда омассув па Ӆапатнаңк унты йисув. Щиӆта Пуӆңават унты пароман Ас уншсув. Пулңаватан еша ӆапкаятан няврэмата мосты пормас ӆутсув. Па щита хоӆна каматса хатаӆ омассув. Метеор турамн ант эсаӆса – такан вот поӆас ерт пиӆан. Еӆӆы па Мужи вош унты – щиӆта катьран Васьёханов унты ашкуӆа-интерната веӆщи ёхатӆув.
Щиты катра тэӆн няврэмат тутӆиӆаят ашкуӆа унты хой карты юш пуңаӆн хотӆаӆ ӆойӆыӆат. Няврэмат яма утаӆтыты хащӆат па нумасӆат ант сорашк хатӆат манӆат ащиӆаӆ-аңкиӆаӆ па ёхатты унты. Щикут ащиӆаӆ-аңкиӆаӆ ёхӆы манты юшеӆ ищи хув па ӆаварт. Хоты верты, щиты щи уӆапсаев манаӆ.
