Щимащ нэмпи конкурс верыӆыса, хота няврэмат утаӆтам ӆуңтарат потарсат
Ин там йис пораян ханты ясңев еша щащиӆыяӆ. Иса руща питмеӆ, иса рущ ясаңн хоятат потарты питмеӆ. Вуӆы тащ хота ёхаттыйн хуӆӆэн хоты ай няврэмиет рущ ясаңан аӆ щевиӆт. Ханты ясңев па хоӆта манты питас?
Щимащ нумсатан районэв ловат музеян руппатты хоятат ванты па хуӆанты утчисэӆ хоты вошаң няврэмиет рут ясңеӆан потарты хошӆат. Сишн, щи кеша первый конкурс чтецов на хантыйском языке «Родное слово» ӆэщатсат. Мужи воошан 14-мет хатаӆ Ас нопатты тыӆащн музей вантапса харн ар хоят ияха актащисат. Нийӆ няврэм ӆуңтарат утаӆтасат. Па арпелк хоят хуӆанты па вантыя ёхатсат. Няврэмат хой хоты веритас щиты ӆуңтарӆаӆ потарсыӆаӆ. Хой еша еӆэмаса, хой еша паӆас, хой па нэпек эӆты ӆуңтас.
Местаят тамиты ӆарпиӆысат:
– 5-6 таӆ няврэмат: лауреат 1 степени – Анастасия Конева, лауреат 2 степени – Валерия Миляхова, лауреат 3 степени – Андрей Кукта;
– 7-10 таӆ няврэмат: лауреат 1 степени – Агния Штарк, лауреат 2 степени – Анна Шульгина па Виктория Айдаркина, лауреат 3 степени – Варвара Возелова;
– 14-17 таӆ няврэмат: лауреат 1 степени – Алина Еприна.
– Нярэмат ӆуңтарӆаӆ потарсыӆаӆ па мохты ныты питса хой ёӆн опращӆаӆ пиӆн ханты ясаңн потремияӆ па хой анта. Яма потарты няврэм мохты ныса. Хой няврэмат воӆӆы туп-туп потарсат. Сишн мосаӆ ёӆн аңки-аща пиӆн ивевн потремиты, – ястас Тамара Александровна Пырысева. Ӆув жюри хоща омсас па самаңа хуӆантас хоты няврэмат потарсат.
Ӆорвош район ассоция «Ямал – потомкам!» куща Дмитрий Ильич Тарагупта нэман ӆэщатам мойӆапса Ярославу Максарову мойӆас. Совет КМНС Ӆорвош районэв куща эӆты няврэмат ищи мойӆапсаятн масаят. Нина Владимировна Озелова кат эвия, хой меет туса ӆуңтарат потартас, ханты ясаңан ханшам кинигаят мойӆас. Щит Анастасия Конева па Агния Штарк. Ӆув шеек яма ханты ясаңан потарсатан. Мохты ныса ӆув пиӆаӆн ёӆн рут ясңевн потарӆат, ар юр щита щящиӆаӆ верӆат. Иван Эдуардович вананшак ханты ясаңан комиксат ӆэщатас. «Ханты монсь» нэмпи комиксат кашак няврэма мойӆас.
Ун пумащипа утаӆтыты нэңата: Алла Прокопьевна Пырысева, Юлия Герасимовна Миляхова па Лариса Петровна Жаринова. Ӆув ар юр понтсат няврэмат ханты ясңа утаӆтыты. Ӆув ханты ясаңна туңа-щира ханшты па ӆуңатты утаӆтаӆат. Ёӆн туп мосаӆ аңки-ащи пиӆна потарты. Щиты-ки ханты ясңев ант ёрэмаӆэв.
Жюри хоща омпсам хоятата Тамара Александровна Пырысева, Галина Николаевна Максимова па Дмитрий Ильич Тарагупта пеӆа ищи ун пумащипа ястаӆув.
– Кимет-пуш тамщ конкурс районэв ӆоватн верлэв, – ястаӆ парк-музей «Живун» куща нэ Ольга Владимировна Малькова. – Па вантӆэм хоты няврэмат ханты ясңев уйтӆат!
