Восяховса олысьяс костын этая ныы бабасэ тэдісныс кудз Шомес Дуня
Чужэма кӧрдорын 23 август тӧлысее 1923 во вылын. Местэыс шусема Вӧргашор, сыа Воркута дорын. Ай-мамыслэн вӧлэма дас челядь. Лоя кольлэмась куш квайт, а эстальнэйыс дёлянаныс на бырэмась. Сы пӧраас ай-мамыс кӧрдорын ветлэмась нин Тюмень область кузя, а мӧд рӧдвужыс вӧлэмась Изьва му вылын. Тӧӧнас семьяыс кӧр чукарнас воӧмась Берёзовлас дорэ, а гожэмнас вӧрзьылэмась Саранпаульсянь Мыжыэдь, а сесся каамась Тильтиме, код сулалэ Сыня ю вылын.
1939 во вылын айыс, Гаврил Васильевич, пырэма Мыжыса колхозас, а май месеч вылын сы воас жэ семьяыс мунэма ооны Восяхов вӧлэсьтэ.
Вӧлэсьтыс вӧлэма сы пӧраас пырпыр дёля. Сэн олӧмась нин некымын эстяк да изьватас. Сулалэма кымынке чом, да дёля керкаяс. Сэн изьватассьыс олӧмась нин Александр Васильевич Конев (Черлам Элисан) семьяыскед, Чупров Иван Архипович (Архип Вань) да Пётр Архипович Чупров (Варвара Петровналэн Шашкова дядьыс да айыс), Филиппов Иван Иванович. Сёрджык вӧлэсьтас вӧлі чукартэма сельхоз артель «Гӧрд туй». Веськедлысен пуктэмась Чупров Иван Архиповичес. Евдокия Гавриловналэн семьяыс воджык олӧмась чомйын. А сесся айыс Норысгортысь небема помасэдь абу карэм керка, да вайемась Восяхов вӧлэсьтэ. Керкасэ ортсалэмась карны Конев Николай (Тусь Микулай) да сылэн пиыс Терентий.
Вӧлэсьтыс кучема быдмыны. Локтэмась выль семьяяс. 1936 во вылын воссис неыджыд велэдчанин, кӧн вӧлі только нёль класс. Веськедлысен вӧлэма Ведров Георгий Григорьевич. Челядьыс вӧлӧма этша. Сидьжэ карэмась неыджыд интернат.
1941 во вылын вошйема Ыджыд тыш. Сэк став сьӧкыдыс усема бабаяс да том ныыяс пельпом вылэ. Ныа кералэмась яг, пыжэн ноолэмась торф. Эстяк-Мыжыысь ноолӧмась удобрение огородас. Ветлэмась Горка вӧлэсьтӧ кӧйдэсла. Мотора пыж сэк из на вэ и сыэн том ныыяс быдла ветлэмась сынэмен. Раскарчёвка местэас вӧлі ыджыд видь. Сэн быдтӧмась картапель, капуста, сёрки, свекла. Тӧӧнас вӧясэн верёвочкаэн ноолэмась чери Салехардса чери сёян каран заводас.
Евдокия Гавриловна дёляджык вокыскед, Володякед, гожэмнас кыйлӧмась чери Романов Иван бригадаыскед. Рӧбетаыс вӧлэма зэй сьӧкыд, медча арнас. Ылласэ кэйдэдас, а бур паськем абу вӧлэма, няньыс из тырмы, частэ тшыг олӧмась.
Ыджыд тыш эштэм бӧрас 1946 во вылас воӧма вӧлэсьтас и Иван Петрович Ануфриев, код бӧрвы лоӧма мед дона мортӧн олэмас. Тыш вылас сыйӧ босьлэмась 1941 воас Лорвожысь. В1947 воӧ Евдокия Гавриловна да Иван Петрович этласемась. Нылэн вӧлі сизим челядь. Недыр и олӧмась. 1961 воын мужыкыс кулэма фронтовэй ранаяссьыс. Сідз дӧва коли этнас челядь чукарэн. Карсьыны вӧлі никытче, кудз кужис этнас быдтіс и велэдіс.
Ыджыд тыш дыръя карис быдчема пӧлэс рӧбетасэ, а бӧрвы рӧбитэма прачкаэн интернатас, сесся пырэма пэварэн велэдчанинас. Пенсия бӧрас барана рӧбитэма и только 1977 воын петэма шоччыны. Пенсия вылын ортсалэма быдтыны нук-нучкаяссэ. Сылэн 28 нук, 36 пправнук и 3 праправнук. Нель челядь: Екатерина, Василей, Николай да Григорий олӧныс Васяхов вӧлэсьтын, Татьяна нылыс семьянас Мыжыын, Анастасия Тарко-Салеын и только Надежда нылыс мунлэма ми округысь и олӧ Ишимскей раайонын. Медбӧр пӧрааас оліса Григорий пиыс дорын. Ас нимлунэдьыс из оо кымынке лун. Евдокия Гавриловна Ануфриева быри август тӧлысе 5 лунэ 2013 во вылын, но сыэ пыр пӧмнитэныс и радейтэныс оз куш рӧдвужыс, но и Восяховса олысьяс.
Евдокия Гавриловна да Иван Петрович Ануфриевьяс вӧйна дырйи кудз и мукед йӧз пуктісныс ыджыд пай Вермем вылӧ.
