Валентина Петровна Коневалы 20 лунэ апрель месече тырис 85 ар

Александра Ивановна да Пётр Алексеевич Рочевъяслэн 20 лунэ апрель месече 1938 во вылын чужэма Валентина нима ныы. Сы пӧэраас семьяыс ветлісныс кӧрдорын Ханты-Мансийскэй округ кузя. Ай-мамыс рӧбитэмась Казымса колхознэй бригадаын. Олӧмась зэй бура сы пӧраэдь, пока ми странаанум из во лёк юор, вошйема Ыджыт тыш. И вот кудь казьтылэ ассьыс олӧмсэ Валентина Петровна:

«1942 во вылын айеэс босьтісныс Ыджыд тыш вылэ. Казымедь лӧтчисныс подэн. Ме сы пӧраас вэлі нин нёль арӧса, а Элексей воке вит арӧса. Вот ми куимен, ме, воке да маме кольедлім сыйэ. Ныа муніныс воде, а ми бӧр косім. Сэк иг и тӧдэ, мый мед дона мортнумес ми аддям медбӧрысь. Кор айе быри, ми нӧшта кык во ветлім кӧрдорын. Сэн зэй миян ортсаліс айелэн дёляджык вокыс, Рочев Николай Алексеевич. Сыэ тыш вылэ из босьныс, вӧлі том. Сесся ми мунім ооны Казым вӧлэсьтэ. Сэн ме эштэді велэдчанинсэ. Школасянь зэй мӧді вӧӧны велэдысен и муні думанам велэдчыны. Но гожемнас вои водзджык гӧсти бабе дорэ Мыжы вӧлэсьтэ. Мамелэн рӧдыс тавыс татысь. Сыа Никанор чукарысь вэлі.

Татэн оліс Демитрей кузнеч, сыа вэлі мед бур ёртэн Конев Яков Герасимовичлэн. Этпыр сыа менэ сыкед и тӧдмедіс. Воисныс бабе дорэ вечерка вылэ. Сэн и адзысим. Сыа менум зэй сьӧлэмам воис. Сэтысянь олӧме вежсис. Быд рыт гуляйтім важ больничасянь да поштаӧдь. Сесся сэн креж вылас лавич вылын пукалам, сёрнитам да шотчыштам да бара воде. Сёрнитыгмоз и тӧдмалім бурджыка ёрта ёртнумес. Сэк уна пара ветлалісныс. Уна пӧ водча волам да бара. Вӧлэсьтыс сы пӧраас дёля вӧлі и зэй ветлооны никытэн. Ме вэлі воӧма ныы. Мене зэй никод из тӧд. И важья тарухаяс эшинаныс видедчисныс пыр завес сайысь гусен. Сэк быдэнлы вӧлі дельнэй, кодкед сыа Яков ветлалэ. Этпыр ми гуляйтам, а Яковлэн мамыс турун карысь воӧмась да керкаас крежысь каӧ, а ми водча локтам. Бараже юасема кодлыське, кутшэм сэтшэм ыджыд тушаа ныыкед ветлалэ.

1956 во вылын этласим. Велэдчем помлась коомысис вунэдчыны. Олім матушкаяскед этік дёля керкаын. Пырі рэбитны прокуратура. Сыа вэлі ми дорсюнум матын. Менэ босьтісныс пос мыськыны да курьерэн. Прокурорыс сэк вэлі Шестаков, нимсэ эні вунэді нин, и ог тшапкысь. Ме сэн лоомті кык пач, ачум пес поткедлі, пос мыськи, тӧӧнас лым дзимлялі. Сесся документьяс ноолі уголовнэй делаяс судэ. Рӧбиті вит час асысянь. Сэтысянь и петі пенсия вылэ.

Ми гозъен быдтім сизим челядь. Эні коли только этік. Яков Герасимович кулі 2001 во вылын. Ми сыкед олім 45 во. Менам 8 нук-нучка да 13 правнук. Код татэн, код Лабытнангын, код Алтайын. Кэнке выйымесь на племеникъяс, но ны помла ме ог тэд. Важэн письме гижим да ставсэ тӧді, а эні телефон кузя ставыс сёрнитэныс. Мен оз звэнитныс, а ачум нин ог куж».

Валентина Петровна эні олэ Стёпа внукыскед пача ккеркаын. Эніэдз на ломтэ пач, кудь и важэн.

Сы дорэ волэныс Совет ветерансянь. Оз вунэдныс. ӧтпыр даже ноолэдлісныс Изьватас керкаас, мед пасйыны Ыджыд лунсэ.

Тав сьэлэмсяньнум ми чолэмалам Валентина Петровнаэс Ыджыд пасэн. Кэсъям дзоньвидя лун, бур мыкыд да мед дырджык на оліс.