Таӆаң хуӆам хатаӆ Ёмвошн ар тахаят эӆты ёхтам хоятат ханшам рупатайӆаӆ альсыӆаӆ па кимет потрат хуӆантман утаӆтысат
Щохар тыӆащ 20-мет хатӆ эӆты па 22-мет хатӆ унты Всероссийская конеренция финно-угорских писателей ӆэщатыса. Международный организация «Северный форум» па Федеральное агентство по делам национальностей щимащ уйтантыты хар нётсат ӆэщатты.
Ар ошаң хоятат ёхатсат – этнографат, литературоведат, ханшты па толмащты хоятат, нэпек хотатн рупатты ёх па утаӆтыты нэңат. Россия, Веңгрия, Беларусь па Моӆова хон муват эӆты аратӆ ёхтыӆысат.
Ямал мувев эӆты хут хоят тохи яңхиӆысат. Щит ханты ясаңан ханшты па толмащты ху – Геннадий Кельчин, кина айкеӆат верты нэ – Юлия Накова. Ханты ясаңан моньщат ханшты нэ – Зинаида Лонгортова. Энамты ёх эӆты ищи хоятат вусат, щит Дмитрий Кельчин – ӆув меет ай лауреат литературной премии губернатора ЯНАО. Иван Сандрин – ханты ясаңан айкеӆат ханшты энамты ху. Па щаӆта Катравош эӆты Светлана Бухарова – ӆув ханты ясаңан ханшам ху Данил Китаев рупатайӆаӆ ияха акатаӆ.
Тохи яңхам арпелк хоятӆув Ӆорвош район эӆты уӆӆат, щит шеек ям щи. Мохты ныӆа хоты ханты ясңев ант ёрэмаӆа, ханшӆа па еӆӆы туӆа. Щиты утантыты лотан потремисат толмащты вер эӆты, иньщассат хоты ямашк па туңашк вер верты рахаӆ. Хуӆантсат хоты толмащӆат кимет ясңатн, хоты ӆув рупатайӆаӆ еӆӆы туӆӆаӆ.
Зинаида Лонгортова ун рупата верас. Ӆув ияха йи нэпека актас ханты ясаңна ханшам рупатаят. Щи яӆпа этам нэпекаӆ «Араң, монщаң, потраң ёх» пиӆн презентация верас.
– Ма нумастэмн тамащ лот ханшты хоятата мосаӆ. Энамты хоятата шеек мосаӆ. Уншак хоятат хуӆантман еща ӆув эӆтыӆаӆ утаӆӆан па ошена яӆап верт ёхатӆат, – ястаӆ Дмитрий Кельчин. – Ин ма ханшты нэпекем нэмаӆ «Мосты шамана» па яӆпа эсаӆӆэм. Нумастэмн, яӆап таӆ кеша этаӆ. Щаӆты нумас понтсам, кимет таӆ эӆты ханты ясаңна потрат ханшты учиӆам. Мосаң веритӆам.
Кельчин Дмитрий благодарностян президента Ассоциации финно-угорских писателей Еремей Айпин эӆты мойӆам. Шеек ям мойӆапса, щи онтасн хоӆна еӆӆы уратӆа ям мосты нэпекат ханшты.
Щиты, конференция етшам юпина кашаң хоят яӆап нумпсат па айкеӆат пиӆан ёхи манас. Па еӆӆы ӆаваӆты питӆув яӆап ханшам рупатаят!
Сумат (береза)
Сергей Есенин
Сумат юх ӆойӆ
Ма ишнем еӆпийн.
Лаңкисам ӆонщаӆан
Селохан ворӆыйӆ.
Кияртам ям нувӆаӆ
Ӆонщ раван руватмаӆ,
Ищимет ар кураң
Сэваӆ иӆ эсаӆмаӆ.
Щиты щи ӆойӆ,
Кутпаң ат кутан,
Оӆаман лаңкасман,
Нови ям сумтыем.
Сорни тут луман,
Тыӆащан поханман,
Ӆонщсэмат лямпиӆат.
Хоӆаңаӆ ар хутлен,
Там хатаӆ па этаӆ,
Йохатӆа ар ӆонщен
Нувӆаӆа па питаӆ.
Геннадий Кельчинна толмащса