Анна Ивановна Конева вермас быд сунис да тӧварысь вурны мичатор
Восяхово вэлӧсьт зэй нин озыр сяма мортӧн. Коймӧд по ветлi сэтчӧ и ставыслӧн, кодӧс ме сэтысь тэда, выйим кутшӧмкӧ талант. Да став олысьыс шуӧ: «Восяхово – медча бур». Выль тэдмасьӧм – Анна Ивановна Конева, кудз ставыс сые тэдӧныс, – Катра Анна. Анна Ивановна рэдитчис Мыжыын 1931 воын и тайӧ мортыс быд лун ӧзйӧ ооны и сылӧн, дзоля челядь моз, никор синмас оз кус ӧгыртор – тайӧ менӧ и восхититiс миян сёрни ёртын. Сям. Катра Анна вурӧ Изьватас паськӧма мича аканьяс, кужӧ кыйны ставсӧ носкисянь кофтаӧдз, кыйӧ бисерӧн цветокъяс, вурӧ Изьватас паськӧм, мальча, пим да тэбек и кужӧ гудӧкасьны, сьыны да йӧктыны. Кудз велалiнныд кыйны крючокӧн юалӧм вылӧ шуӧ: «Миян сэк никутшӧм крючок из вӧ, ми нюкыльтлiм ем да сыдз кыим. Велалi ачум, ас юрсюм думышталi кыемторъяссӧ». Керкаыс Анна Ивановналӧн ставнас быдпӧлӧс ас киӧн вурӧм да кыем торъясӧн. Аканьясыс мичаа суутӧдӧмась: «Нуке тай кор волӧ, пукседас аканьяссӧ диван вылас да топсе челядь садик». Медча ыжыд куклаыслӧн тушаыс 104 сантиметр – топ настоящӧй морт. «Сые Валя нылӧ ваис Тюменьысь. Менам челядьяс пыр тэдӧныс, мый менум колӧ. А сыдз менум пыр вузасянинысь звэнитӧныс кор аканьяс вайӧныс – босьта кыкес запас вылӧ» – юксе люмъялiгмоз героинянум. Тайӧ газет петасын тiян ликмас комияслӧн лунпас. Календарсӧ мичмӧдӧныс Анна Ивановналӧн аканьясыс. Сэтӧн нин матыссянь позе видзӧдооны, мый вурӧма быд аканьыс став традицияяс кузя: сарафан улын кык юфка, быдӧнлӧн выйим кӧмкот, важъя бусы, баба юр, сьӧд прэшви, сарафан, сос да передник. Быд ас киен карӧмтор карӧма сьӧлӧмсянь да кужэмен. Ставсӧ, мыйӧ бостьчӧ Катра Анна, вайӧдӧ помӧдз. Весиг ӧнiя лунъяссӧ лымсӧ керка дорын ачис димлялӧ ставнас. Сыдз велӧдӧмась: «Абу пукооны ӧтик местӧын да ставсӧ карны совесть вылӧ». Анна Ивановна помлась гижны позе уна на. Тон ми восьтiм куш ӧтик сям. Кутшӧм Анна Ивановна рэбитник, нималана морт, гӧтыр, мам, баб да ёрт – гижам мэд газет петасын.
