Оз ӧтик нэм нин ооныс Мыжы вэлӧсьтын Конев чукар или кудь изьватасъяс тэдӧныс Сергей Федька Иосиф Гоша рэд
Вот кудь казьтылэ Вера нылыс: «Ае, Конев Георгий Иосифович, уна челядя семьяын рэдитчылӧма Мыжы вэлӧсьтын. Велэдчема школаын, кудь и став челядьыс. Кор вошщис Ыджыд тыш Георгий Иосифовичлы вэлі 17 ар. Вэйна вылэ сыэ босьтісныс 14 лунӧ июль месече 1942 воӧ. Воджык нуисныс Омске, кэн кымынке пэра лэседісныс мед ыстыны фронт вылэ. Вэюйтіс 2, 3, 4 Украинскэй фронтъясас, вэлі стрелок-автоматчикэн 235 стрелковэй пэлкас. 1944 воас март месече вэлі ранитчема, кор дорйӧмась Бук ю. Февраль месече 1945 воас ранитэмась мэдысь, кор босьтӧмась Будапештсэ. Георгий Иосифович пасйэма медальясӧн «За отвагу», «За Победу над Германией» да мукӧд юбилейнэй медальясӧн. Орденас «Отечественной войны 1 степени» пасйӧмась нин 1985 во вылын.
Ыджыд тыш бэрын воис Мыжыӧ. 1948 восянь пырис рэбитны милицияӧ, кэн служитіс 28 во. Сэтысь и пенсия вылэ петі.
Маме, Конева Мария Павловна, баражэ рэдитчыліс Мыжыын, вэлі ыджыд семья костысь. Мыжысаяс тэдӧныс кудь Пале Коль Марья. Велэдчанинсэ эштэдіс Ыджыд тыш дыръя. Школа бэрын 1945 во вылын пырис рэбитны сельсоветэ секретарен. Сылы сы пэраас вэлі 19 ар. Сы бэрын примитіс улльё Киеватын. 1950 воын муні мэд рэбета вылэ зверофермаӧ ведущэй звероводэн. Сэн сыа рэбитіс пенсияӧдь 26 во. Сы пэраас йӧзыс из вермы шоччыны и Мария Павловна пырис рэбитны каролитысен сбербанке. Шоччан лунъясас уна вурсис. Вурис тюфли, гэна буркаяс, кыйис йи».
Георгий Иосифович да Мария Павловна томсянь нин вэліныс тэдсаэсь. Но зэй сьӧлэмвылас воис мича ныы, кор том зон воис Ыджыд тыш бэрын. Гожэмнас дежурство бэрын Киеватэ невестаыс дорэ ветліс сынэмен машъянёлэн. Визьлас, аддзысясныс, сёрнитасныс да бэр воас. Этласисныс ныа 2 лунӧ октяб месече 1948 во вылын. Том гозъя асьныс карисныс дёля керка Колхознэй нима улича вылас. Тон сыа Гагарина улича ним. Сэн нылӧн рэдитчис квайт челядь. ӧтик пи Валерий да вит ныы: Людмила, Светлана, Вера, Надежда, Ирина. Томсянь видисныс скэт. Гозъялэн вэлі баляяс да мӧс. Вэлі огород, кэн быдтісныс картапель. Кыйисныс чери, а гожэмнас карисныс турун.
Сёрджык 1978 воас Коневъяслы сетісныс квартира кык вейся керкаысь. Сэтчэ ныа петіныс мед дёля Ирина ныыныскед. Эстальнэйыс вэліныс нин быдмемась и быдэн олісныс ос олэмнаныс.
Челядьыс Георгий Иосифовичлэн да Мария Павловналэн быдмисныс дружнэя. Ас примернаныс петкедлісныс кудь колэ бура оны, абу дышэдчыны, кыызыны пэрысьяссэ. Быдэн петі мортэ бурэ.
Валера пиныс 8 класс эштэдӧм бэрын велэдчис Салехардын ГПТУын кочегар вылэ ва да пар котёл кузя. Рэбитіс ломтысьӧсен зверофермаын.
Людмила ныныс 8 класс бэрын муні велэдчыны Салехардэ национальнэй педучилищеӧ. Велэдчанин эштэдэм бэрын лои велэдысен. Сыэ ыстісныс рэбитны Восяхов вэлэсьтэ. Став олэмсэ пуктіс дёля челядь велэдэм вылэ. Из ӧтик поколение лэдь. Став велэдчысьяс пэмнитэныс ассьыныс медводь велэдысьсэ Людмила Георгиевнаэс, код вэлі бур, ласков и сетіс бур топыд тэдэм. Уна сылэн велэдчысь муніныс сы туй кузя. Тонъя лунэ сыа шочче пенсия вылын.
Светлана ныныс дас класс эштэдӧм бэрын муні Тюмень карэ. Сэн сыа пырис велэдчыны ТЮМГУӧ. Эштэдӧм бэрын лои роч да литература велэдысьӧн. Оны кольчис Тюмене. Уна во рэбитіс воспитателен дёля челядь садын. Сесся кор муніныс семьяыскед Сургутэ оны, пырис рэбитны отдел кадраас Сургутнефтегазас. Сэн пенсияэдь и рэбитіс. Эні шочче пенсия вылын.
Вера ныныс кудь и ыджыджык чойяссыс ассьысь олэмсэ пуктіс дёля челядь быдтӧм вылэ. Дас класс бэрын муні велэдчыны Ханты-Мансийскэе воспитатель вылэ. Эштэдӧм бэрын воис ас чужан вэлэсьтас. 13 во рэбитіс воспитателен, 2 во методистэн и 15 во веськэдлысьӧн челядь садикас «Алёнушка». Медбэр воясас вуджис веськедлыны мэд садике «Буратиноас». Эні шочче пенсия вылын. Ортсалэ быдтыны нукъяссэ. Вына веруйтэ енлы. Уна во нин сьылэ вичкоас молитваяс служба дырйи.
Надя ныныс школа бэрын пырис велэдчыны Новосибирскэй вузасянин институтэ. Эштэдэм бэрын став олэмсэ пуктіс сы рэбетаас. Эні шочче пенсия вылын.
Мед дёля ныныс Ирина дас класс эштэдэм бэрын муні Омскэе. Сэн сыа пырис велэдчыны финансэвӧй техникуме. Уна во рэбитіс бухгалтерэн. Кызь во только пуктіс поселение администрацияас. Пенсия петэм бэрас муні оны Салехардэ.
Георгий Иосифович быри 1988 воын, а Мария Павловна 1991 воын. Конев гозъя век нин абуэсь, но нылэн ныыясыс, нукъясыс да правнукъясыс воде выы нуэныс паметьсэ рэдвуж йылысь.
