Ӆорвош районэв ӆоватн кашаң куртан хоятат порыӆасат па каш версат
Тови хошам хатӆат щи ёхатсат. Щиты рахаӆ ястаты хун Ворңа имен кащаӆыӆэн. Па яна щи ункер тыӆащ оӆаң хатӆатн ворңа тур сыйт щащты питсат. Хоятат потарӆат катра йис пораян хун мувн нэмоӆты ӆыӆ рув ант щащас туп еӆта ёхтам Ворңа имен такан тур сыяӆн уваӆмаӆ: – Варах! Варах! Щи сый эӆты иса войт па хоятат нох верӆысат па уӆапса еӆӆы манты питас.
Щаня мувн меет оӆаңн Ворңа хатӆ поснтасэӆ. Музей эӆты па каш верты хот рупатты хоятат Овкурт лепан порыӆыты хар пуңаӆан ияха хоятат акатсат. Овкурт утхот куща ху Иван Григорьевич Рочев мойӆапса ясаң китас. Па щи юпина концерт верса.
«Щаня ёх» хорам арт аремиты ӆойӆысат. Ирина Куртямова па Валерия Куртямова каш версат па ёхтам хоятат касапсаят ӆэщатсат. Турмеӆ щи хатаӆ шеек ям уӆмаӆ, хошам найяң хатаӆ уӆаӆ. Яма якам па ариям юпина потам хуӆ ӆэсат па каврам хошьйиңк инщсат.
Кимет, нийӆмет хатаӆ ункер тыӆащн Мужи вошн уӆты ун хоятат Ханты-Мужи курта яңхсат. Щита ӆув кещаеӆ ищи каш верса. Ун хоятат ӆув щирэӆн катра иты емаң хатӆэӆ порылысэӆ. Эпӆаң ӆэтот омпсыӆысэӆ па сумта сешкан-шук ярсат. Мойӆапса ясаң потартас Дмитрий Ильич Тарагупта. Инна Романовна Лонгортова каш верас, хорам арат арияс па ёхтам ун хоятат якты вохсаӆы. Яма якам ураңна Валентина Григорьевна Лонгортова па Тамара Павловна Конева мойӆапсаятн мойӆасаят.
Щаӆта, сютчаты хатаӆн, субботаян па хоятат ияха актащисат емаң хатӆэӆ еӆӆы порыӆыты ураңна. Щита уйтантысат хой хащам хатӆатн ёхатты ант вератсат. Меет ун районэв ӆоватн порылыты хар Ӆорвошна верыӆыса. Тохи хой веритас яңхас.
Васьёханов эӆты ариты нэңат «Ас хорам нэ» пиӆн яңхсат. Щита лудв концерт масат па этаӆтасат хоты ӆув туса вератты хошӆат. Выставка «Каркам ёшиет» поныӆысат. Щи тумпина тохи ёхи ёхтыӆысат Пуӆңават эӆты каш верты хоятат. Ӆув ун концерт масат. Хоятат шеек умащӆыман вантсат па хуӆантсат. Кашаң хорам ар па як юпина такан ёшпат сэңксат. Депутат областной думы Лариса Дмитриевна Цупикова мойӆапса мойӆас Владиславу Ильичу Кельчину.
Ӆув шеек туса ёнтасаӆ па аремиты па хошаӆ. Ариты группаят «Сорни най», «Ӆорвош нэңат», «Шондыбан» па «Ас хорам нэ» ищи мойӆапсаятн хойсаят.
– Вуща уӆаты рут хоятат! Там хатаӆн емаң хатаӆ, там хатаӆн Ворңа хатаӆ! Ай эвет па ай похат вущат! Катра йис порайн муң ащиӆув па ун аңкиӆув порыӆысат там порайн, хун ворңа нэңен ёхтас там мува. Яма верӆан вераты па еӆӆы тумтака уӆаты! – щимащ ясңат щи хатаӆн Ханты-Мужи куртан ёхтам хоятат хуӆантсат. Ӆув кешайӆаӆ Инна па Леонид Лонгортов «Сорни Турм» пиӆн шеек умащ концерт масат, хорам арат арисат па яксат.
Щи тумпина парк-музей хуват рахас экскурсияят ванты па хуӆанты. Тэӆыя каш верты лотат ӆэщатамат. Няврэмат па ун хоятат кеша мастер-класс «Ворңа калащ» верам. Кур ӆыпиян ӆув эпӆаң калащт шартсат. Кашң хоят хой ӆытас веритас каврам шай па хошьйиңк инщты. Меет ӆаваӆсат хоятат хун нярхуӆ нёхарты питӆа. Тампуш оӆаңпуш щимащ касапса верса хой хорамашк па сорашк нярхуӆ ӆэщатаӆ. Щи касапса нэмаӆ «Мужигортская строганина – 2022». Няӆ хоят нумас понтсат потам хуӆ нёхарты. Ветхощъяң минут сыс мосмаӆ сора па хорамаңа потам нярхуӆ нёхарты. Кашң хоят хошаӆ туса хуӆ ӆэщатты. Ӆув айтэӆн щи вер уйтӆэӆ. Хоты нёхарсат вантсат нэман актам жюри хоятат. Щиты оӆаң места шитас Иван Сандрин. Еша ёхи хащас Алексей Пырысев. Хуӆмет местая питас Владислав Пырысев. Щос щирн Эдуард Сандрин меет сорашк хуӆ нёхармас.
– Ма вуӆы тащ хотн иса усам. Щита иса сора мосаӆ верты. Сишн муй ётты, сора хуӆэм нёхармасэм па вер етшас, – няхиӆыяӆ Эдуард Романович Сандрин. – Ма места ант шитсам. Щи кеша похем нох питас, муй атом. Сишн нумас ям!
Яма порыӆыям па сютчиям юпина хоятат кимет таӆ унты пойкащман Ворңа имен эӆты тумтака уӆты вохсат па сяшканат емаң сумтата ярсат.
