Ыджыд тыш бӧрын Влас Георгиевич Бусыгин воӧма ооны Ямал му вылӧ
Фронт вылӧ сюри менам айӧ – Влас Георгиевич Бусыгин. Сэк на сыа из вӧ гӧтра, олӧма ай-мамыскӧд Егор Федорович и Пелагея Григорьевна Бусыгинъяскӧд да куим чой на вӧлэма. Олӧмась Тюмень область Исетскӧй район Малыши сиктын. Семьяыс вӧлӧма крестьянской, служилӧй казак костысь асьныс, кодъяс оомӧдчӧмась паськыд Сибирса муясас дас квайдӧд нэмсяньыс и водзӧ. Дедӧлӧн, кӧнкӧ, вӧлӧма бронь, колемась нянь быдтыны. Тылас нылы бара жӧ уна сюрӧма. Из куш сьӧкта рэбитныс, но и колi местнӧй «бронированнӧй» веськӧдлысьяс костын кудзкӧ кужны сьӧкыдсӧ бертны.
Айӧ войнаӧдз служитӧма армияын и миме сыа сюрӧма война биас. Ӧтiк тыш вылын ставнас нылӧн дивизияыс усьӧма. Айӧс контузитӧма. Сайдсьыс петӧма немеч серниысь – сiдз сыа пленӧ сюрӧ. Сыа неӧтпыр война да плен помлась абу нинӧм казьтылӧма. Пленӧ сюрны сэк лыддьысьӧма мед лёкӧн. Сыйӧн олыгас неӧтпыр абу ошйысьӧма, мый сюрлӧма война биас. Плен бӧрас на бара служитӧма, Европа страна муясас ортсалӧмась кыпӧдны бур олӧм.
Токо 1946 во вылас Австрияысь воӧма ас чужан сиктас, код Тюмень дорын. Аддзас кудз сьӧкта, нужнӧя олӧ йӧзыс вӧлэстьясас, да вербучас Войвылӧ поштаӧ рэбитны. Сыа сюрӧ Яр-Сале вӧлэсьтӧ, кӧн и аддзысясныс мамекӧд, сэн и ме рэдитчи.
Кор тон шуӧныс, мый ми сьӧкта олам, кудз этша сьӧм босьтам, кутшӧм миян странанум лёка да нужнӧя олӧ, мен юрам пыр локтӧныс рӧдвужӧ, кодъяс ас выннаныс пыкисныс став война дырья сьӧкыд олӧмсӧ.
Ныа кыпедiсныс руныссӧ, уна рэбитiсныс мед водзӧ ооны аслыныс и сетны олӧм водзӧ йӧзлы. Ме муӧдз мыкыртча ны водзын.
Сьӧкыдъясыс, кодӧн медбӧр дас вояссӧ олӧ миян странанум, оз позь этлооны нелямын вояса война олӧм жугедӧмыскӧд да йӧз воштӧмкӧд.
Жаль, мый ӧнi ог вермӧ куш ёрта ёрткӧд ӧтiк сёрниӧ воны, пыр мыйкӧ юкам – канму, власть, мусӧ и сiдз водзӧ. Гӧгӧрвоа, мый сыа тонья олӧм, но токо чӧӧ видзӧдӧныс ме вылам карточкаяссянь менам рӧдвужӧ, мед ме вистоолi ставсӧ, мый тӧдмалi ны помлась.
Гижис Татьяна Гостюхина.
Вуджӧдiс Мария Ёлтышева.
Воис ыджыд война вылысь морт…
Воис ыджыд война вылысь морт…
Сiйӧс виччысис пармаса горт:
Ичӧт ю бокӧ ляскысьӧм сикт,
Керка, мамыс кӧн ӧтнасӧн дзик.
Кыдзи виччысис!
Ой жӧ да ой!
Вӧлi тувсовъя вой, югыд вой!
Вӧлi кыр паныд котӧртны рад
Сизим орден-медаля салдат.
Лӧня визувтӧ ю…
Вой шӧр бӧр –
Асъя кыаыс муртса на гӧрд.
Буретш чӧскыда шойччӧны йӧз,
Кодъяс гӧрисны тувсов лун чӧж.
Чайтсис, узьӧ быд вӧралысь пон…
И сэк воськовсӧ ньӧжмӧдiс зон.
Пуксис йӧр бокӧ.
Личӧдiс ноп –
Лыа туйсӧ эз дженьыда соб.
Торкны эз кӧсйы мамыслысь ун –
Сылы вичмас на котралан лун!..
Сӧмын мамыс кор ломзьӧдiс пач,
Гортса ӧдзӧсӧ игӧдчис надз…
Воис ыджыд война вылысь
Морт.
Альберт Ванеев.
