Тулыс

Заводитіс шонді
Тӧвлысь вежны лад,
Яра сотны пондіс,
Воис тувсов кад.

Кӧдзыд лун-вой быри,
Сыліс еджыд лым,
Юыс ваӧн тыри,
Гымалӧ нин гым.

Надзӧникӧн киссьӧ
Муяс вылӧ зэр.
Сулалӧ да мыссьӧ
Зэрнас пемыд вӧр.

Нимкодясьӧ сэтӧн
Небыд коръя кыдз.
Мича турун петӧ,
Вежӧдӧма видз.

Мӧдлапӧлын кылӧ
Утка, дзодзӧг, юсь.
Колипкай нин сьылӧ,
Колипкай оз узь.

Зіля гӧрӧ, кӧдзӧ
Муяссӧ колхоз.
Трактор вылӧ пӧчӧ
Дзоргӧ шензигмоз.

Челядь котыр ворсӧ,
Котралӧ лунтыр.
Тувсов гажа горсӧ
Кылан сэні дыр.

Михаил Лебедев.

Миян муӧй

Муӧй, миян муӧй,
Миянлы тэ муса.
Кор ми тэнӧ аддзам,
Шогъяс миян кусӧ.

Важысянь ми тэныд
Чорзьыны эг сетлӧй…
Тэ вывті ми зіля
Югыд гӧрйӧн ветлім.

Небзьӧдім ми тэнӧ,
Дӧзьӧритім ёна…
Муӧй, миян муӧй,
Миянлы тэ дона!

Тэ вылӧ ми няньсӧ
ӧтув вынӧн кӧдзим,
Мортлы сёянторсӧ
Быдмӧм вылӧ лэдзим.

Кӧйдыссӧ ми тэныд
Колян арын перйим,
Весалім став ёгсӧ,
Мичаджыка бӧрйим

Гӧгӧр тэнӧ потшим,
Талялӧмысь видзим.
Муӧй, миян муӧй,
Шуам тэныд сідзи:

«Бура чужты няньсӧ,
Вужъяссӧ эн косьты,
Няньлы петан туйсӧ
Шонді улӧ восьты!

Лэптысяс мед вылӧ
Идлӧн-сюлӧн юрыс.
Некор мед оз бырлы
Тэнад татшӧм бурыс!

Йиа шерлӧн лёкыс
Тэнӧ мед оз сулы!
Ыджыд аттьӧ шуам
Тэныд, миян мулы!»

Михаил Лебедев.

Вай олыштам чӧв

Вай олыштамӧй чӧв, мед сёрнитасны синъяс,
Мед йӧктас наын пӧсь сьӧлӧма би.
Вай казьтыштамӧй талун сійӧ шудаинъяс,
Кӧн коркӧ вӧлім и эг вӧвлӧй ми.

Вай олыштамӧй чӧв, тан кывъясыс оз ковны,
На пыдди шуас ставсӧ войся лӧнь.
Ми пемыд синма войсьыс дугдам ӧні повны
И югдӧдас мед туйсӧ Чӧж туй вӧнь.

А ылі туяс петтӧдз пукалыштам сідзи,
Мед лӧньсӧ торкас сӧмын шы ни тӧв,
И гусьӧникӧн быдӧн шуам: «Ен мед видзас»,
И вӧрзям — быттьӧ нинӧм эз и вӧв…

Но кодкӧ тӧдтӧм шога видзӧдліс мем синмӧ
И кодкӧ шуис: «Бергӧдчам вай бӧр».
И чужӧмбанӧ кӧдзыд лолыс сылӧн инмӧ,
И шуштӧм шыӧн омлялӧ сьӧд вӧр.

Ме коркӧ ылі туйӧ кӧсйи эськӧ петны,
Да бордъясын тай эз на тырмы вын.
Жар бипурыслы лолӧс ассьым кӧсйи сетны,
Да бипурыс тай вӧлӧма нин кын…

Алёна Ельцова.

Бара тулыс

Бара Войвылӧ юсьясӧс кыскӧ.
Бара косьясын ворсӧдчӧ ком.
Ловзьысь вӧр-васӧ небыд зэр мыськӧ.
Гӧгӧр кажитчӧ мича да том.

Кывтӧ ю, быттьӧ олӧмыс кывтӧ.
Зэвтчӧ лун тӧлӧн енэжлӧн вон.
И став ловъялы эскыссьӧ кывтӧг,
Мый оз ло тайӧ олӧмлы пом.

Пётр Бушенев.

Олӧм-вылӧм!

Олӧм-вылӧм!
Став кӧсйӧм и колӧмӧн
оз тай нырвизьыс мун, оз тай
тшӧктыссьы.
Коркӧ косьӧбтас ныр-вомад олӧмыд,
коркӧ кокньӧдлас —
сьывсьӧ и йӧктыссьӧ.
Талун сьӧкыд, и пемыд, и кынтӧдӧ,
быттьӧ кок увсьыд вошӧма
ордымыс,
аски видзӧдлан:
шондіыс ыпъялӧ,
тэнӧ пыкӧны пӧльяслӧн ортъясыс,
ловтӧ лэптӧны козьналӧм бордъясӧн.
Лэбан-чилгысян олӧмыс веркӧсӧдз.
Шоныд сьӧлӧмлы, ывлакӧд
ёртасян…
Тадз и Омӧль да Ен костас
шердйыссьӧ…