Там хащам ӆапатн округев ӆоват эӆты Пуӆңаватан спортсменат ӆув кутӆаӆн кассат
Кашң ай куртыенан энамты няврэмат самаңа ӆохн хухатӆыӆат, ӆув шоши уӆапсаел яма уйтӆэӆ. Сишн хот эӆты, куш ай куртые эӆты, няврэмат пора хайман касты лотата яңхӆат. Щита утаӆтыӆаят хоты мосаӆ ухаӆ шоппи наварты, хоты ӆайм хой хувашк вощкиты. Хотаң няврэмат тынщаң ёваӆты айтэӆн хошӆат. Сора-сора хухаӆты ищи хошӆат. Щи иса хошты верӆаӆ ивевн мосӆат вана тайты па икуӆатн касты ӆойӆыты. Щи пораян нох этты рахаӆ. Сишн Ӆорвош районэв щимащ энамты ёх ар, хой нохшак уратаӆ.
Катра Овкуртан няврэмат пиӆан рупатс Александр Семенович Конев. Ӆув морт-кем арат чемпионат энмаӆтас. Ӆув хощаеӆ яңхам няврэмат мастерата йисат. Ин ӆулв ищиты еӆӆы няврэмат утаӆтаӆат. Щиты ӆув юшӆ еӆӆы туӆ Василий Сергеевич Лонгортов.
Курк тыӆащ 18-мет хатаӆн Пуӆңават вошн касапса Чемпионат и Первенство ЯНАО етшаптас. Таӆаң вет хатӆ ёх па эвет юращсат. Ищипа хой юраңшак нох этсат па хоӆна яӆап рекордат версат. Нэңат кутан меет юраңшак па каркамшак Мария Куртямова. Ӆув уже кат-пуш чемпионка России. Ӆулв тампуш яӆап рекорд понас: 422-пуш ухаӆ шоппи навармас.
– Ма 14 таӆ эӆты тамщ касапсая яңхты питсам. Оӆңа ашкулаян, щаӆта колледжан, ин па еӆӆы щи вер туӆэм. Ма шеек самаңа щи вер тайӆэм, щи щира ар рупатӆам, – ястаӆ Мария Артемовна. – Нумастэмн, хоӆна манэм яма нётап вераӆ утаӆтыты ху – Александр Герасимович Лонгортов. Ӆув ищи мастер спорта па чемпион России.
Щи тумпина Ӆорвош район Щаня ёх ищи яӆап рекорд понтсат. Щит Михаил Ивочкин, ӆув Овкурт эӆты. Ӆув хуӆам пуш кат курн навармиман меет хувашк питмаӆ. Щиты ӆув яң метра тумпия питмаӆ, туңа-щира-ки – 10 метров 46 сантиметров.
Сишн нох питам шоши хоятӆув ешауӆ еӆӆы касты манӆат. Ин па ӆулв Ямал мув этаӆтыты Россия хон мувев хуват манӆат. Ат яма юращӆат па касӆат, па ат нох питӆат!
