Мыжыса олысьлы Иван Иосифович Чупровлы 11 сентяб тӧлысе тыріс 85 ар
Чужис и быдмис изьватас морт крестяна семьяын 11 сентяб тӧлысе 1938 во вылын. Мамыс, Дьячкова Дарья Кузьмовна, вӧлэма Якуня рӧдысь ыджыд семьяысь. Мамсьыс кольлӧма 6 арӧсэн. 17 арӧн петэма вересса Чупров Иосиф Иванович сайӧ. Гозъялэн вӧлэма 11 челядь. Иван Иосифович костаныс почти медбэр. Сы бӧрын нэшта ныы. Ай-мамыс волӧмась из сайысь. Сы пӧраас уна семья вӧліныс Изьва муысь, медча код ветлаліс кӧрдорын. Бӧрвы ныа пошті ставыс пуксисныс Лорвож районэ, код кыче. Код омедчис Мыжы вӧлӧсьтэ, код Восяхове кольчис, код нэшта кытче. Дарья Кузьмовна бырэма, кор сылы вӧлӧма 66 ар. Кудь казьтылӧ пиыс, мый больичаын пуктэмась абу сыйӧ уколсэ. Айыс бырӧма нелямын арӧн дизентерия висемысь, кор Иванлы втырэма куим ар. Став чой-вок костысь выйым нэшта чой, коді олэ Владимерскей обласьтын.
Ыджыд тыш эштӧм воас Иван Иосифовичлы вӧлӧма 7 ар. Кудь ачыс казьтылӧ: «Школаын велӧдчи этша. 14 арсянь нин сынӧмен ветлі Сыняӧ. Куимысь точнэя калі. Велэдчанінсэ чӧтэм бӧрын нёль воо ягысь пес кыскалі. 1952 воас кучи плашкоут вылын рӧбитны. Сы пӧраас сэн олісныс калмыкъяс. Бӧрвы Иосиф Ларионович Сталин кулэм бӧрын ныйӧ лӧдісныс и ныа ставныс муналіныс ас му выланыс».
1957 воас босьтісныс армияӧ. Служитіс куим во и бӧр керкаас воис только 1960 во вылын. Армия бэрын ӧтік во рэбитіс рыбкоопын, сесся пыріс совхозэ. Сэн рэбитіс дас во. Сёрджык пыріс ремгруппаӧ плэтникен. Кызь вояс карисныс бригадаыскед быдчема пӧлэс ӧтік и кык вейся керкаяс. Тон на сулалэ кык вейся керка кодэс карис Иван Иосифович.
1962 воын сыа гэтрасис. Ассьыс гӧтырсэ адзис Восяхов вӧлэсьтын. Ёртӧн олӧм чэжас лои Филиппова Мария Ивановна. Сыа вэлі Яквань рӧдысь, ыджыд изьватас семьяысь. Томсянь колі мам-айтэг. Сыйэ быдтіс Татьяна Ивановна чойыс. Мария Ивановна уна во рэбитіс колхознэй кантораас кассирын Восяхов вӧлэсьтын.
Чупров гозъя ӧтлаын олісныс 42 во. Быдтісныс куим пи. Мария Ивановна гӧтырыс уна во нин кудь муні модор югдэ и сы пӧрасянь Иван Иосифович олэ ӧтнас. Став олӧм чӧж видисныс скӧт. Нылӧн пыр вэлі мӧс, вӧӧ, куканъяс. Во кык только коли кудь Иван Иосифович сдайтіс ассьыс мӧссӧ совхозэ, пурт улэ лӧдьны из вермы, киыс из кыпетчы бырэдны, зэй нин сьӧлэмсяньыс радейтэ ассьыс скӧтсэ. Внук внучкаясыс быдмисыс, муналіныс ооны код кыче. Ӧтнасыслы уна оз коо, да и арлыдыс нин абу том.
Аслыс карліс кык керка. Пияныслы ортсаліс карны керкаяс. Айыскойд жэ зэй сяма и шӧркост пиыс Александр, коді ас кинас карӧ быдчема пӧлэс карэмторъяс пуысь да кэртысь. Пияныс быдмисныс ставыс бурэсь. Ставыс служитисныс армияын, эштӧдісныс ыджыд велӧдчанин и ӧні рӧбитӧныс. Быдэн этая олӧмас кужисныс аддзыны ассьыныс тшӧтш олан ёртныссэ да быдтыны челядь. Тонъя лунӧ Мыжы вэлӧсьтын олӧ только шӧркост пиыс Александр. Ыджыд пиыс Михаил велӧдчем бӧрас кольчис оны да рӧбитны Тюмене, но айыс дорӧ волӧ быд во. Мед дёля пиыс Володя гозъен пиянныскед муніныс ооны Салехард карэ. Миян юбилярнумлэн вит нук, ӧтiк нучка и ӧтiк правнучка.
Иван Иосифович вӧлі пасйӧма уна пӧлӧс грамотаясэн да благодарностьясэн. Сылэн выйым звание «Ветеран труда» да «Ветеран Ямала».
Ми став сьӧлӧмсяньнум чолӧмалам Иван Иосифовичес ыджыд юбилеен. Кеймам дзонньвидза лун, лӧз енэж юр вылас, бур шуд да кузь нем. Мед дона, шоныд сьӧлӧм вылас, мый челядьыс нетпыр оз вунэдныс ассьы-ныс айныссэ да дедныссэ. Став бурсэ дона юбиляр!
