Новый Уренгой нэмпи вошн ияха актащисат энамты хоятат, хой арсыр моньщат, потрат па ӆуңтарат веӆщи ханшты питчасат
Ун воша кашаң районӆув эӆты ошаң энамты хоятат ёхтыӆысат. Ӆув щита таӆаң няӆ хатаӆ вусат, щит 9-мет хатӆ па 12-мет хатӆ айтахаят потты тыӆащ унты. Меет оӆаң хатӆ ӆув вошӆаӆ па куртӆаӆ эӆты хой муйн веритас ар тахаят эӆты ёхатсат. Арпелк хоятат тохӆаң хопатн ёхатсат, хойтат карты па машна юш хуват исат. Йи энамты хоят ёхи хащиӆыйс, шув ураңна Мыс Каменный эӆты вертолет ант этмаӆ. Ӆув туп кимет хатаӆн, хун турам ямашк ювмаӆ юпина ёхтас.
Оӆаң хатӆ етнапелка, хун арпелк хоятат ияха ёхатсат, окружной фестиваль ямальской книги пуншса. Тампуш ӆув ветмет пуш верыӆыса. Там фестиваль ипуш кат таӆн ӆэщатыӆа па кашаң пуш ар-сыр вошатн. Там сус ӆув Новый Уренгойн энамты ёх, хой велщи ханшатты питчас па учийӆ ӆуңтарат па потрат ханштыя, актыӆыйс. Кимет пуш фестиваль верӆа 2025 таӆн. Ноябрьск нэмпи вошн нумасӆа уйтантыты лот ӆэщатты.
Кимет хатӆатн энамты ёх ар-сыр утаӆтаты лотатн – ашкулаятн, колледжатн па техникуматн кимет энамты хоятат пиӆан уйтантысат па потремисат хоты ӆув ханшатты питсат па этаӆтасат муй ханшсат. Еӆӆы туты нумасӆаӆ эӆты альӆысат. Айшак ашкуӆа няврэмат умащӆыман хуӆантсат па яма иньщассат рупата эӆты. Хой няврэмат ищи нумас понтсат туса ханшатты па монсят ияха акатты па еӆӆы монсьты.
Новый Уренгой ун вош. Щита сот щорс моӆтас хоятат уӆӆат. Аратӆ рупатая еӆта ёхтам рущ хоятат па па сыр рут хоятат. Вош хулатн шоши шимӆаң рут мир хоятат – хантэт, урт па селькупат – ант и шияӆаӆн. Сишн вошн уӆты няврэмат, арпелкаӆ, воӆаң щимащ хоятат эӆты ант уятӆат. Энамты ханшаты ёх, хой ай куртат эӆты ёхатсат, щи эӆты няврэмата потарсат. Щиты Пулңават эӆты вусат Дмитрий Кельчин па Некоча Окотэтто, Мыс Каменный эӆты – Макар Окотэтто, Красноселькупский район Толька вош эӆты – Виталий Баязитов па Иван Сандрин Мужи вош эӆты. Щи энамты ёх ханшам рупатайӆаӆн шоши мувӆаӆ па шоши хоятӆаӆ эӆты потарӆат.
– Ма хун утаӆтыты Хон Петра воша мансам, шеек самемн ёхи таӆсаям, ёхи уратсам, кашӆы питыӆысам. Щиты нумасӆам нэпека понтсыӆӆам, камтса ай ӆуңтарые рут мувем эӆты ханшсам, – ястаӆ Иван Сандрин. – Ханшам отӆам там ӆотатн уйтты хоята та этаӆтысӆам. Меет уншак щит, Роман Круглов, литературный критик, секретарь Союза писателей России. Ӆув яма ӆуңтас ӆуңтарӆам па ястас шек ям, щи вер еӆӆы туты мосаӆ, ёрэматы ант мосаӆ. Няврэмат кеша щимащ ӆуңтарат рахты питӆат. Щи тумпина ма ханты ясаңна айкеӆат верлам па шоши хоятӆув эӆты ханшӆам.
Ямал мув энамты ёх тумпина хоӆна Волноваха нэмпи вош эӆты ханшты няврэмие ёхтыӆыйс. Щит Эдуард Колос. Ӆув уӆты муваӆн вананшак ляль сый щащиӆыяс, сишн Эдуард сам такман катӆасаӆ, хувн яма ант сютчиӆыйс. Ямал мува ӆув веӆщи ёхтас, тата ӆувеӆ шеек умащ. Меет самаңа ӆув шимӆаң шоши рут мир хоятӆув эӆты инщасас, хоты ӆув уӆӆат, хоты веӆпасӆат. Щиты мосаң ӆув яӆап кинига нэпек ханшаӆ Ямал мувев эӆты.
– Кат таӆ хащаман муң Пулңаватн «Ругинский клуб» версув – щита ханшатты энамты ёх ияха актащиӆат па уйтантыӆат. Ныты питса муй арат муң хощаев ошаң ханшатты няврэмат уӆӆат. Щиты муң еӆӆы вер понтсув – шоши мир уӆапсаев, хантэт па ур ёх уӆапса эӆты нэпекан такан ханшты мосаӆ. Ант мир ӆоватан уятӆат муң шоши хоятӆув эӆты. Меет саман ям хун энамты ёх ӆув рут ясаңеӆ ант ёрэмаӆэӆ па ун амат ёхатӆ хун ӆув ханты ясаңна ханшӆат, – потарӆ Дмитрий Кельчин. Ин ӆув кимет кинига ханшаӆ. Ешауӆ таӆ соханты унты ӆувеӆ етшаӆӆы. Оӆаң рупатайӆ «Мосты шамана» нэматна понман уӆ. Хоятатн умащӆыман ӆуңатӆа.
Фестиваль етшаты хатаӆн верса региональное отделение Совет молодых литераторов Ямала при Союзе писателей России. Щит шеек ям вер. Щи сахат рахаӆ нёттыя энамты хоятата, хой веӆщи ханшаттыя питчаӆ. Иса хой фестиваля ёхтыӆсат Совет хоща ӆоңсат. Ӆув ищи питӆат ошаң энамты ёх канштыя па ӆувеӆаӆ нётты.
