Тонъя Мыжы мича да ыджыд вэлӧсьт. А уна вояс сайын сыа только на чужис и ньӧж вошщис быдмыны. Вот кудь вэлі

1794 во – Мыжыгортскӧй чомъясын вэлi 2 хозяйствэ и 38 олысь. Сэн олэмась Ердаковьяс да Мошкинъяс.

Тайӧ муясас Романовьяс воисныс 18 немын, а Тогачевьяс – 19 немын.

1840 воын Мыжы вэлӧсьтын вэлі суутӧдӧма пу карӧм вичкоо, код вэлі пасйӧма Вежа Архистратиг Михаиллы, а сідь жэ вэліныс кыпедӧмась кык керка енлы эскысьяслы, кэн бы ныа вермисныс пыртны христианаӧ татӧн олысьясӧс.

1844 воын волӧма Обдорскӧ венгриаса ветлысь. Полуй кузя да Из кузя Мыжы пыр ветлӧма Берёзов карӧ. Тан сыа гижалӧма йӧзкостса легендаяс да сьыланкыыяс.

1840-1850 воясас унаысь кылышлӧмась серни роч йӧзӧс вэтлӧм йылысь, кодъяс бусьтӧ оомедчемась юасьтӧг войыы йӧзлӧн муяссӧ.

1850 воын мунӧма торжок – вузасьӧм, кодӧс нуӧдӧмась 7-8 лунъяссӧ нояб тӧлысьӧ. Сэтчӧ волӧмась рочьяс, эсьтякъяс да Архангельскӧй муысь изьватасъяс. Тайӧ торжок вылас вэлӧмась татшӧм донъяс: 5 сюрс ур куысь сетлӧмась 350 шайт, 500 кӧр куысь – 250 шайт, 300 неблюйысь мынтысьлӧмась – 450 шайт; 20 мальча вежлӧмась 160 шайт вылӧ.

1851 воын Мыжыын вэлӧма 72 морт. Пасйысьӧ, мый 1860-70 вояссӧ кымынке изьватас семья оомедчемась керка олӧмен Мыжыын, вошйӧмась ооны вузасемӧн. Сэк тайӧ вэлӧст пырті мунӧма вузясан туй – Обдорск – Изьва вэлӧсьтъяс костын.

1878 воын вэлӧма нин 41 оланин.

1878-1880 воясын Из сайысь воӧмась зэй уна изьватас. Медчасӧ оомедчӧмась Саранпаульы, Обдорскын, Берёзов карын да Мыжыын. Тайӧ воясас метрика книгаясын паныдасьлӧныс Хатанзеевъяс, Валеевъяс.

1881 воын олӧныс нин Мыжыын 10 изьватас семья.

1884 воын карӧмась выль вичкоо важ сотчӧм местӧас. Но мэд вичкоыс бараже сотчылӧма. Сэк жэ купеч Окуев Берёзов карысь ас сьӧм вылӧ Мыжыын карӧма приходскӧй велӧдчанин.

1884 воын Мыжыын олӧма 16 изьватас семья, а куим во мысьті нин – 20. Тайӧ вэлӧмась Семяшкинъяс, Вокуевъяс, Чупровъяс, Филипповъяс, Рочевъяс, Ануфриевъяс да Коневъяс.

1889 воын карӧмась коймӧд вичко.

1893 воын вэлӧма нин 36 изьватас семья.

1894 воын вошйӧмась быдтыны картупель, турнепс да сёркни. Во мысьті пасйӧма, мый Мыжыса приходскӧй школаӧ ветлӧ 36 изьватас челядь.

1897 воын кор гижӧдӧмась олысьяссӧ, сюрӧмась сы гижӧдас 3 яран семья. Нем помасем дырйи Мыжы вэлӧсьтын олӧма нин 73 изьватас семья. Сідь вэлэсьтыс ньӧж быдмис. Содчисныс выль керкаяс, выль олысьяс.

1924 во вылын Мыжы вэлэсьтӧ воис югыд би. Керкаы позис эшӧдны туч 1 лампочка.

1930 воӧ артмис Лорвожса район да Ямало-Ненецкӧй округ.

1939-ӧй во – лэьӧдӧмась медводдя кӧдзан муяс районса колхозъясын. Но сы помла, мый ыллаыс вэлӧма зэй лёк, коомема босьтны урожайсӧ лым улысь. Сы воасбосьтӧмась уна картупель.

1939-ӧй воын чукартісныс коми фольклорнӧй коллектив Мыжы вэлӧсьтын. Уна вын пуктіс тайӧ уджас хорӧн веськедлысь Ульяна Игнатьевна Немчинова.

1940 воӧ сентяб тӧлысьӧ петі медводдя номер «Сталин юш хуват» нима газет. Изьватас кыывылын шусис«Сталин туй кузя». Газетлӧн вэлі кык лист бок и петіс сыа кыкысь вежолуннас. Редакторӧн вэлі Александр Григорьевич Борцов, секретарен – Таисья Владимировна Конева.

1940 воас садикӧ ветлӧныс 25 челядь, ны костын 15 – изьватас да 10 – роч.

1941 воын йӧзыслӧн вошйис зэй сьӧкыд пэра. Воис Ыджыд тыш. Сэк сиптісныс кык малокомплектнӧй школа. Сы пэраас Мыжыса велӧдчанинын уджаліс изьватас велӧдысь Яков Васильевич Хозяинов.

1941-1945 воясас Мыжыса шӧр школаын вынсялӧ военно-физическӧй челядьяса дасьтӧм. Мунӧныс лыйсьӧм кузя вермысемъяс, лызен ветлалӧм 10-20 км-ӧдь, нуӧдӧныс военнӧй ворсӧмъяс.

1942 воын июль тӧлысьӧ воссис Мыжы вэлӧсьтын черикаран завод. Сы воас жэ Мыжы вэлӧсьтын муніс медводя сельскохозяйственнӧй петкедлӧм. 12 мед бур колхозъяс петкедлісныс ас киӧн карӧм торъяс. 17 мӧд бур уджалысъяс костысь 9 морт вэліныс «Ленин туй кузя» колхозысь.

1942-1943 воясас сиптісныс нэшта ӧтик велӧдчанин, сы помла мыля вэлі этша челядь и ныэ вуджӧдісныс велӧдчыны Мыжыса школаӧ.

1943 воын Мыжыса чери каран заводын уджалысьяс кыйисныс черисӧ кык пээ унджык планысь. Сэк пуртыс из тырмы и комсомолечьяс чукартісныс 70 пурт да ортсалісныс карны черисӧ.

1945 воын Мыжыса черикаран заводын вэлі 444 спецпереселенец, кодъяс олісныс Лорвожын, Войкар-Вомын, Горкаын. Ны костын вэліныс 75 кулак сетӧм нима морт, 10 немеч, 191 эвакуированнӧй да 168 калмык.

1945 воын жэ том йӧз муніныс лызьясӧн Мыжысянь – Горкаӧдь и бэр. Туй вылас муні 18 час.

1945 воын эштіс Ыджыд тыш. Кучисныс локны керка айясныс, вокъясныс, дядьясныс.

Олӧмыс муні воде. Сы пэрасянь уна ва визытіс. Важъя йӧзсьысь колі нин зэй этша морт, код бура тэдӧ и пэмнитӧ сы пэрасӧ. Эні ми олам пырпыр мӧд олӧм.