Колян во помас Мыжы вэлэсьтын Юган дорас восьтiсныс выль модульнэй лямпаэн войлан керка. Тон вэлэсьтас томьяслэн ыждыд позянлуун видзны асьныссэ дзоньвидзаэнэсь. Зэй бур шоныд керкаас, код Юган бӧкас, выйым янас жыръяс, кӧн позе аслыд бӧрйыны лызь войлыны, позе чӧсмасьны пым тшаен да кофеэн. Позе войлэм бӧрас прӧстэ шотьчыны. Сiдзже сэн выйым уна пӧлэс тренажерьяс, кӧн позе быд лун лысемтэ шонэдны.
Гӧрд лентасэ район юралысьыскед вундiс нималана лямпаэн войлысь Галина Филиппова.
Баба рӧдыс вӧлэсьтын важсянь нин пыр рӧбитысь морт, бур хэзяйка, уна челядя. Сыа оз виччы мед сыйе ошкисныс, мед кыпедiсныс. Этiк сэтшэм морт, мича нима Галина помла мӧдi бы тiянтэ юортны. Чужис и быдмис сыа Лорвож район Мыжы вӧлэсьтын ыджыд бур семьяын.
Мария Пантелеймоновна да Владимир Гаврилович Вануйтолэн вӧлi сизим челядь. Мария Пантелеймоновна Вануйто рӧбитiс совхозын. Тӧӧнас пес пилитэмась. Сы бӧрын техничкаын рыбкоопас вӧлэма. Владимир Гаврилович рӧбитэма совхозас плӧтникын. Челядьсэ дзолясянь велэдӧмась рӧбитны. Асьныс керка карӧмась.
Тон детиныс дзонен Мыжыас олӧныс. Только Рая ныыныс олэ Пермскей крайын. Ай мамныс пыр челядьныссэ велэдэмась бура ооны ас костаныс, ортсоны ёрта ёртныслы.
Мария Ивановна зэй рӧбетшэй мортэн вӧлэма. Нетпыр весь абу пукалэма. Сы вылэ видедэмен и челядьыс велэдчемась сiдз ооны. Тӧднин, сизим челядьсэ быдтыны абу кокни. Сыйен гозъен отторэ рӧбитэмась. Сiдз и быдтэмась челядьныссэ. Кор уна челядь абу же лёк, ортсалэныс ёрта ёртныслы. 50 арэн петэма мамныс пенсия вылэ.
Тон Володя пиныс котельнэйяс рӧбитэ, Надя ныыныс – пожаркаас, Галя, Альбина и Рая пенсия вылын. Семьясьыс Альбина этнас школа бӧрас воде велэдчема. Помалэма педучилище Салехардын. 42 воысь выытi рӧбитiс садикын.
Галина вӧлi семьяас коймедын. Айныс пыр лямпаэн ветлэма вӧрэ кыйсьыны. Дзоляэн на Галина вошъема айыс лямпа вылэ сутны. Керка дорас и велэдчема медводз ветлыны гынкота лызен. Бур войлэмысь нёльэд класстын сетэмась сылы водясем ботинкиа лызь. Радыс сэк нылыслэн вӧлэма помтэм. Сы пӧрасянь нылыс кучема топта вӧдитчыны войлыны лызьнас.
Медводзын, тӧднин, сыа войлiс Мыжыас, ас вӧлэсьтын, сэн босьтiс уна диплом да грамота. Сэсся нин петi округ шӧрэ и мунi воде. Быдлаын сыа вӧлi водзын.
Тон Галина Владимировна хэть и пенсия вылын, но пыр сыа быд лун гожем ли, тӧӧ ли – тренажёр вылын, тӧӧнас на войлэ лызен ордйысемьяс вылын.
Максим пиыс олэ мамыскед. Дзолясян ворсэ футболэн да хоккеен. Энi сыа велэдэ челядьсэ ворсны хоккеен, тренер.
Галина, Николай вересыскед бараже асьныс керканыссэ карэмась, нылэн куим челядь, нёль нук. Кор аслад керка, тӧднин, рӧбетаыс пыр уна. Галина Владимировналы шотьчыны никор. Керкасэ этнас вӧдитэ. Тӧднин, кудз и быд вӧлэсьса бабарӧдлы мед ыджыдыс сыа керка гӧгэр олӧмыс. Галина Владимировналэн аслас выйым неыджыд огород, кӧн сыа быдтэ картапель, уна пӧлэс турунсёян, огурцы и керка дорыс тырэма быдчема дзоридзьясэн. Мыжыас уналэн асланыс огородьяс. Сэн тавыс быдме. Воеса му вылас, кӧдзыдысь оз быдтыныс огурцы да помидор, сыйен кареныс парникьяс. Вот и Галина Владимировналэн выйым неыджыд парник. Сэн же неылын быдме укроп да лук.
Сыйе тавсэ колэ вӧдитны. Уна ортсалэ мед дзоля пиыс Максим. Ыджыджык пиыс и нылыс олӧныс Салехардын.
Семьяас сэсся никод оз войлы лызен, но тав челядьыс и нукьяс вӧдитченыс спортэн. Хоккейнас ворсыген Максим нападающеен, кудз и Саша племянникыс. Сашалэн дзоля вокыс, Максимлэн мӧд племянникыс, сулалэ вӧрэтаас, кудз важэн айныс. Тонъя лунӧ детинаыс олэ Салехардын, велэдче школаын и пыртэма округса сборнэйяс хоккей кузя. Максим висьталэ, колэ уна вын тренируччыны, кудз и быд ордйысемъясас. Кудз тэ асьтэ петкедлан тренировкаяс вылас, сiдз тэ кучан и ворсны хоккеен и петкедлыны асьтэ.
Мыжыас во гӧгэр йиыс абу, сыйен йи вылас трениручченыс куш вит тӧлысь, а мӧд пӧраас кыпедэныс ассыныс вынныссэ, вӧдитченыс залас, уна войлалэныс. Лӧседченыс тӧӧ кежэ. Быд во ныа ветлэныс ордйысемъяс вылэ округе и округ сайе. Тӧднин сьӧкыд, шуӧ Максим, ордйысьны ныкед кодъяс во быд ыслалэныс йи вылын. Да и челядьыс нылэн унджык.
Галина Владимировналы пыр бур дума вылас, кор челядьыслэн тавыс аркме, а ныа мамныссэ радейтэныс да вылэ кыпедэныс.
Быд спортэн вӧдитчемас колэ вын, терепене, пӧра воштыны, асьтэ тавнас сетны сылы. Только бура лэседчан ке, помас воас ыджыд результат. Куш сiдз сыа велэдiс ассьыс челядьсэ.
Колэ шуны, мый гожемнас, Галина Владимировна пыр тренажёрьяс вылын вӧдитче, мед дась вӧӧны тӧлоо лямпаэн войлан кежас. А тон сэн выйым уна позянлун. Таво Мыжыас восьтiсныс выль молодёжно-спортивнэй шӧрин. Сэн вермасныс коворкинген, фитнесэн вӧдитчыны, юны кофе. Сэн жэ волонтёрьяс вермасныс чукарчыны, да тренажернэй залас выннысэ кыпедны.
Галина Владимировналэн уна пӧлэс грамота да медальяс. Хӧть и мунi сыа шотьчыны, но спортсэ чӧтны оз мӧд, воде на сыа уна мый мӧдэ карны. Кӧсьям сылы мед вӧлi дзоньвидза, уна вын воде лямпаэн войлэмас, мед пыр вӧлi водзын да видзис асьсэ, и нетпыр выныс из быр.
Гижис Мария Чупрова.
