Мортлы колана быд лунья олӧмын мыйенкеэн вӧдитчыны и гажедчыны. Сыа мортыслы и сетэ вын. Вой вылас мортыслэн дзоньвидзалуныс – сыа сылэн озырлун.

Сыйен медводзсянь, кор кучисныс татэн кыптыны оланиньясыс карисныс ставсэ мед мортыс вермис вӧдитчыны физкультураэн да сы пыр бурдэдчыны.

Тон спортыс мед популярнэй вӧдитчем став ямалса олысь костас.

50-60-эд воясас школаясас и да уджалысь чукар костас медча кучисныс войлоны лямпаэн и лыйсян спортэн, национальнэй видьясэн, лёгкей атлетикаэн. Ордйысемьяс школа, вӧлэсь, спартакиадаяс, туристалэмыс, лямпаэн войлэмыс – ставыс сыа лӧсядлiс тонья олыштэмаяслы. 60 во сайын странаын кучис паськоны ГТО значокьясыс («Готов к труду и обороне»).

Сы пӧраас вошйисныс сыйэ нуэдны физкультура и спорт юкеньясыс, райком комсомола, спортэ вӧдитчысь чукар «Колхозник», «Урожай», Спортэн вӧдитчемыс, кудз и тон вӧлi сезон костын.

Мед вына районас вӧдитчисныс лямпаэн войлан спортнас. Олимпийский спорт видыс мунi 1924 восянь.

Ямалын 40-эд вояс помас округса чемпионьясэн лямпаэн войлэм кузя вӧлiныс Афанасий Иванович Конев и Анна Васильевна Чупрова (Артеева Матрёна Васильевналэн чойыс), ныа выннысэ кыпедiсныс округ шӧринэдз ветлыгас.

Мукеддыръя спортсменьяс и ныйэ вештысъяс вына вошйылiсныс кыпедчыны кутшэмке политика серти. Сiдз, 1951 во вылас бӧрйӧмъясэ лӧседчыгас йӧзкосса судыс район шӧрин комсомольецьяскед карэмась агитация нуӧдан лямпаэн войлэм. Нелямын километра Мыжысянь – Восяховэдз и бӧр войлэмась Бичуренко Александр, Чупрова Анна Васильевна, Антон Николаевич Валеев и мӧдъяс. Мӧд чукарыс кытчэ пырисныс А.Шахова, Кугаевскей и Подрезова войлiсныс Мыжысянь – Анжигортэдз. Округ ордйысем вылэ, код мунi сэк Верховный Совет СССР Бӧрйӧмъяс кежэ Мыжысянь лямпаэн воедiсныс Александр Крылов и Анатолий Яковлевич Хозяинов. Ныа Мыжысянь Салехардэдз и бӧр лямпанас мунэмась – 420 километра.

Сталинса конституция Лун кежэ военнэй и спорт кузя мунiныс стрелковэй ордыйсемьяс, кэн воде петiныс финанс-банкын рӧбитысьяс, райком партия и райком ВЛКСМ спортсменьяс. 44 очко 50-ысь сюрэмась мелкокалибернэй винтовканас райфинотдел инспектор А.Ф.Хозяинов и РКВЛКСМ аппарат рӧбетник Г.Н.Витязев.

Тӧӧнас лямпаэн войлiсныс бӧрйэма дистанцияяс кузя, мед бур войлысен вӧлiныс кӧкьямысэд класстын велӧдчысь Юрий Мокринский (Юрий Васильевич) да Борис Филиппов.

Сэк округса спартакиада вылас Шурышкарса район сборнэйыс петэма мед водзе, сэтчэ пырӧма лямпаэн войлэм, тяжёлая атлетика, национальнэй видьяс (гез кыскем и дадь выытi чеччалэм). Командаас пырисныс Мыжыса школа велэдчысьяс, физкультура велэдысь, Мыжыса рыбкоопын рӧбитысь, колхозник «Путь Ленина» колхозсьыс и лыжницаяс. 12 команда бӧрэ колем бӧрын, районса сборнэйыс воде петi лыжнэй эстафетаас, мед вына ДСО «Буревестник» чукарсэ вӧтэдiс. Ветлалан округса физкультура комитетлысь призсэ босьтiс Шурышкарскей район.

Апрель медводз лунас Салехардын мунiныс лямпаэн войлэмьяс «Красный Север» газет приз вылэ. Сы луныс хэть и лымйыс уль нин вӧлi, миян сборнэйыс вермалiс национальнэй педучилище чукарсэ и, медводз дас вояснас вуджалан призыс округса газетыслэн мунi Мыжыэ.

Январ 2 лунэ 1956 воас район шӧринсянь петi агитпереход Мыжысянь – Выль Киеватэ – Ишварэ – Горка – Кушеват – Лопхари – Шишинги – Юганово – Казым-Мыс – Машпан – Азово – Ямгорт – Овгорт – Сохомпол – Важ Киеват – Мыжы. Агитбригадаас пырис 7 морт, ны костысь школьникьяс Мыжы школасьыс – Володя Артеев, Борис Хозяинов, Володя Денисов, Николай Терентьев, Володя Конев. Нылы колi мунны 413 километра, быд вӧлэсьтын пуктыны кэнцерт и лыдзыны лекция. Хэть и сулалiсныс хивуз кӧдзыдьяс, агитбригадаыс тав сьэкыдсэ бертiсныс и мый колэ тавсэ карисныс.

Январ 14 лунэ ныа воисныс бӧр район шӧринас, суткиэн водзджык. Март 1956 во вылас Мыжыын коли район шӧрин первенство лямпаэн войлэм кузя и районса традиционнэй первенство кӧру дадьден войлэмас, нярталаэн шыблалэмас, дадь выытi чеччалэмас.

60-эд воясас нин лойи традицияэн военизированнэй эстафетаыс, кодэс пыр нуэдiсныс Советскей Армия Лун кежэ. Сэк тоже войлiсныс лямпаэн, лыйлiсныс мелкокалибернэй винтовкысь, шыблалiсныс гранатьяс и кыскалiсныс лыжникьяссэ. Вӧӧ вылысын мортлы колi кыскыны лясмпаэн войлысьсэ.

Районас петi ДСО «Труд». Сы чукарнас кымынке пӧра веськедлiс Юрий Васильевич Мокринский, Александр Андреевич Андросов. Павел Галишников веськедлiс райспортотделэн райисполкомас.

Сборнэйыс лямпаэн войлысьяслэн вермис босьны 2 местэ областьса соревнованияс, ордйысемьяс вылын, кэн вӧлi 21 сельскохозяйственнэй районса командаяс.

1980-эд воясас Мыжыын мунi чемпионат Тюменса областьлэн лямпаэн войлэм кузя, кэн миян спортсменьяс асьныссэ зэй бура петкедлисныс.

Медводз мастер спорт нимсэ лямпаэн войлэм кузя босьтiсныс Борис Истомин и Валентина Рочева. 60-эд воясас бура кучисныс асьныссэ петкедлыны спортсмен-лыжникьяс, кудз Марк Назаров, Владимир Терентьев, Виктор Ануфриев, Любовь Смычагина. 60-эд во шӧрас лямпаэн войлан дистанцияясас петiныс выль йӧз. Ны костын Василий Артеев, Николай Чупров, Анатолий Филиппов, Николай Павлинов. И пыр лыжняас вӧлiл Александр Андреевич Андросов. 70-80-90-эд воясас колян нэмын чемпионэн и заслуженнэй лямпаэн войлысен лойи Конев Василий Фёдорович, код пыртiс уна бур лист бӧк районса, округ и область спорт историяас. Сы пельпом сайын уна сюрс километра лямпаэн войлан туй. Кудз и уна том детина сы пӧраас 5 классянь нин спортэн кучема вӧдитчыны.

Ортсалэма пыр физкультураэн велэдысьсыс, код уна вэдитчема челядьыскед, ортсалэмась и ай мамныс. Мыжы школа помалэм бӧрын, ветлэма армия и пырэма велӧдчыны Салехардэ. Училищеас пыр войлэма лямпаэн, а 1973 воас нин округ ордйысемас сюрэма, сэк сыа мунi округса совхозьяс костын.

Ас вӧлэсьтэ воӧм бӧрын пырис миме район сборнэй командаас лямпаэн войлэм кузя. Быд ордйысемын пыр сыа вӧлi водзын. Ветлiс тав Тюменса область пасьта.

Тӧдiс бура Тюмень, Тобольск, Ишим войлан трассаяссэ, войлiс и район шӧриньясас: Упорово, Вагай, Ярково. Быдлаысь Василий Фёдорович локтiс призёроэн, и кыкысь чемпионэн. Шурышкарса район командаыс из этпыр вӧӧ медводзын карса и районса эстафета войлэмас, шурышкарсаяс пыр асьныссэ быдлаын петкедлiсныс вынаэн.

Лямпаэн тшӧтш на войлiсныс сидзже: Александр Кауфман, Любовь Смычагина Горкаысь, Нина Михайловна Шахова, Владимир Терентьев, Юрий Васильевич Мокринский, Дарья Зосимовна Клепикова, Марк Назаров, Филипп Вальгамов, Дарья Кондина, Анатолий Кондин, Валерий Вальгамов, Геннадий Конев, Оксана Хасанова и мӧдьяс. Тавныс ныа пыртiсныс ыджыд пай районса спортас и тон томьяслы колэ ны вылэ видедны.

Том спортсменьяс нуӧдэныс традициясэ ыджыдьяслысь и кучасныс на воде кыпедны нимедны ас достижениенаныс кудз районсэ, сiдз Ямалсэ.

Район, округ и область лыжнясэ вермалiсныс из куш мужикьяс, но и бабаяс. Этiк сэтшэм ны костын Мыжыса Филиппова Галина Владимировна. 4 классянь тон на пыр сыа лямпа вылын. Медводз тренерэн и наставникен вӧлi Касаткин Валерий Васильевич, код казялэма Галиналысь кужэмлунсэ и воде велэдэма. Галина Владимировна 1980 во вылас пырэма и 1984 воас эштэдэма челядь спортивнэй школасэ г.Салехардын лямпаэн войлэм кузя и босьтэма разряд единой Всесоюзной спортивной классификации Кандидат в мастера спорта. Энi сыа Призёр ЯНАО, ветеран спорта. 2017 воас 28 феврале сылы уси ыджыд честь нуны параолимпийскей бисэ Ноябрьск карын.

Нэшта этик лямпаэн войлысь сыа Коротких Надежда Константиновна олэ Горка вӧлэсьтын, код бараже войлiс уна ордйысемьяс вылын да босьтiс уна дипломьяс и грамотаяс.

Важэн лямпаыс и пуясыс вӧлiныс пуысь карэма. Мед бура ыслалiс колi майтны дась мазен, код лэсялiс бы ылла походьяыслы. Сэк бур лыжсэ сетлiсныс куш бура войлысьыслы. Сёрджык лоиныс и батинкиа да креплениа лямпаяс. Тон бур современнэй кокни пластиковей лыжьяс, кодэн кокни и йӧмке войлыны.

Энiя пӧра лямпаэн войлан спортыс пуктэма вылыс ступене. Мыжыас карэма зэй бур трасса, гӧгэр ӧзйэ би, кэн оз куш спортсменьяс, но и быдэн код мӧдэ вермасныс ыслоны.

Тав бурсэ спортсменъяслы, мед и пыр вӧлiныс водзын.