Рочöн этая лунсэ шуэныс Крещение Господне – православнöй вичкоса гаж, пасйöныс быд во öтик пэра тööшöр месече 19-öд лунö
Ва вежöдан лунöн помасьö Вежадыр. Православнöяс сiйöс шуöныс Ва вежöдöм лунöн либö Крешенньööн.
Тайö лунас юяс вылö карöныс йöрдан либö öшмöс. Йöрдансö кералöныс нёль пома крест моз. Лун шöр кадö сэтчö служба бэрас локтэ вичкоса батюшка. Сiйö вежöдö васö молитваясöн лыддьö «Во Иордани», Енъясöн да крестöн, кодöс сэсся сюйлö ваас. Сы бöрын ваыс лыддьысьö вежаöн, бурдöданöн.
Лыддьысьö, мый тайö лунас колö вöтлыны лёк вынъяссö, кодъяс Вежадыр чöж восьсöн шöйтiсны сикт кузя. Вежöдöм ваöн мыськалöныс ки да чужöм, медум мынтöдчыны «сöтанасьыс» да пежсьыс; йöзыс купайтчöныс. Васö босьтöныс ведраяссö либэ ыджыд бутылкаяссö да видзöны во чöж. Вежа ваöн койöныс керка пельöсъяс, мыськалöныс образъяс, сэсся пернапасалöныс.
Сiдзжö висьталöныс, мый вой шöр каднас ваыс быдлаын вежа. Абу кö позянлун босьтны васö вежöдöм йöрданысь, сiйöс позьö гумоотны быд юысь либö ключысь. Унаöн вежа васö босьтö- ныс вичкоысь.
Мукöд сиктъясын шуöныс, мый вежа ва койöмöн позьö вöтлыны тöрöканöс, лудукöс да шыр чукöрöс.
Висьталэныс, мый Ва вежöдан лунö оз позь ёртчыны – Енмыс мыждас сыысь.
Приметаяс Ва вежöдан лунö:
Рöштвосянь Ва вежöдан лунöдз кö кöдзыд, Петыр лунсянь Прокопейöдз зэра поводдя лоö.
Кор Ва вежöдан лунö вичкоысь лэччасныс ю вылö йöрданысь васö вежöдны, сэк кö поп плеш вылö усьö енежсьыс лымчир, сiйö вонас лоö бур урожай.
