Важен изьватасыс зэй вына пасйылэмиась вося праздникьяссэ. Ыджыд грех вöлэма сы лунас рöбитны, шуис Елена Алексеевна Терентьева Салехардысь

Кор ми сёрнитiм сыкед 2006 во вылас, сыа нин сизим дас арысь петэма вöлi. Тон, колэ висьтоны, сыа нин модорюгдын. Мича, статнэй, рам морт. Пыр сыа зэй бура, топта пасьтасема вöлi, плюш жекедкаа. А мыттэм сыа быдчемасэ тöдiс и важья олöмысь, и мойдьяс. Сылэн гöлэсыс и сёрниыс выйым Салехардса архивын. Но зэй бы мöдiм мед и тонья олысьыс тöдiсныс важья традициясэ изьватасыслысь. Вот мый касьтылэ Елена Алексеевна вося праздникьяс помла.

Рöжество

Арся видьыс сыа – ми мознанум арся видь, рöжество пöсыс квайт вежолын мунэ. Рöжествоас пöсыс эштэ, сыа ыджыд праздник. Важэн чомйын ми вöлiм, чомад мый бурыд, мый мичаыд, мый дзоньыд сыйэ пасьталан дi. Бура празднуйтан и лöседасныс, гöтöвитасныс, мый вермасныс. Сыа куим лун Рöжество праздникыс, сыа кудз Ыджыд луныслэн ёртыс тожэ пöст бöрсянь. Сыа Рöжество бöрса, шусе, коле. Разница уна сылэн, корке дженьыд, корке кузь, абу öтмоз пыр.

Этайэ куим лунсэ оз рöбитныс. Керкаын мысьласьны оз позь, ни вурсьыны оз позь, празднуйтэныс, посуда димлётэг никод оз оо, пыр нин карас, мысьласьны, кыс, воль карны оз позь, вурсьыны оз позь куим лунсэ.

Ыджыд лун бэрас бара вежолынсэ. Вежолыныс коле – радольнича бöрас воскресенье. Сэсся вежолыныс коле, вовторникас бара родительскей лун, родительяслы ыджыд лун, видьысь петэ.

Важэн машкуритчисныс. Миян на совхозын томесь на вöлiм, машкуричим. Менам вок да сыа гармонеэн Зональнэйэ ветлэныс. Сьылэныс и йöктэныс, славитэныс.

Славитыгас код мый сетэ. Энi тай ветлэныс дзоляяс, тöрыт на волiсныс ми доранум. А миян айэ, поконик, пыр висьтолiс: «Рöжество лунэ колэ шаньга пöжоны». Славитан лун – сыа деньга славитэныс челядьяс.

Миян кольчем бöрын, ми сэк ныыяс томджыкесь да дяднаныс, да монелэн вок, да сыа гармонеэн ворсыгтэг подэн мунэныс зональнэйэдь. Йöктасныс, сьыласныс, кодюэ – ютасныс, гöститэдасныс. А сэк сыа ветчысян, ветлан и мöд паськемен, а сэк оз позь маска рожасэ кульны, сыа штрафуйтэныс важэн. Ми доранум этпыр воис совхозэ морт пырис, бöкевей морт тшайен ютiм. Морт пырис топ тыреган йöктыны кучис, выысянь мальча пасьталэма гöннас вылэ, уусянь мальча кöмалэма, а кокыс токо тыдылэ, йöктэ, меша код бара сiдз йöктэ, а сыа бара Павлэня воис машкуритчема керкасяньыс.

Миян на чомйын ворожитчисныс, миян тьöт вöлi, мамелэн чой, гумага сотас, еджыд дöра öшöдас, но сыа точнэ тöдiс бумагаыс и висьталас кудз мый. Том народыс гöтрасем помла да мунэм помла медча ворожитчисныс. Сэсся бара пöим петкедасныс пачысь да додь ню костэ пöимсэ кисьтасныс да этiк кокнас тутчасныс. Если керка вересса мунэ – сапег кок туй петэ, если ас койдаыс ке небыд кок туй петэ, и сылы сiдз петi, и арнас вересса мунi керка, Лабытнанге.

Сэсся бара босьтасныс юрныссэ сыныштасныс сынанэн да öбес юр вылэ сюясныс, морт ачыс тöдэ юрсисэ, кутшем юрсиа сылы слöймас мортыс, светлэйке светлэй юрси ло. Код медводз пырас, кутшэм юрсиа, сэтшэм юрсиа сайэ и мунан вересса. Важэн, сыйэ сыа ме ог тöд, маме касьтыллiс, маме баб дорын быдмылэма керкаын – кöсасэ томналас нылыслысь томанэн и сы дорэ морт воас, если кутшем морт сыйэ босьтас, сыа мортыс воас.

Кажитчас, бöраке. Воöма и кутшем айэ поконик вöлэма висьталэмныс кузя, сiдз и вома восьтаннас кор восьтыны кöсасэ.

Гумагасэ сотасныс – сыа бура тöдэ. Ми челядь дырьянум, маме зэй висьысь вöлi, гумага сотiм чойекед и даддя петi. Кык кöра даддя и кык морта, и бöрас на понмыс локтэ, но пырпыр топ кöр кöр и выйым. Мöдасылас миян деднум, поконик, воис и нукыс дадь бöкас, мöд чомйысь.

Сэсся гижасныс бумагаас нимьяс и гаротыштасныс, и сыа о жизни и смерти, щасте и быссен гижасныс. И нимьяс мужикьяслы – баба нимьяс гижасныс, а бабаяслы – мужик нимьяс янасэ жизнисьыс да мыйда, кодлы мый сюрэ. Если кодке кытчеге вересса мунэ кутшем ним сюрэ сетшем сайэ и мунэ бусьтэкесь. Гашке сiдз мукедыс вööсе, кодке гашке из жэ сiдз вööсьыл. Гумагаыс кудз олöмыд – водзе ло, пом ли, смерть ли кутшем мый сюрэ, керка, кöр и бытчемаыс гижасныс.

Важэн уна ворожитчисныс. Энi машкуритчыны петнысэ полан, сякейыс выйым. Челядьяс токо ветласныс каледаяс.

Вичко пыр ветлi. Кор верми службасэ вощйэмсяньыс медбэр помедь сулала. Менэ веське эта вичкоас пыртлэмась, но сыйэ ог пэмнит. Эни вичко быдлаын кареныс. Ноябрьскейын вичко выль да бур, Рожэство кежэ восьтисныс.

Василей лун, Крещение

Рöжество бöрас старэй Выль во – Василей лун.

Сэсся на вежа пуляк петэ. Сыа Рöжество асысянь Микеласянь вошйэ вежа пулякыс.

Вежа пулякыс сыа дзолиндзык чöртьяс, сорлалэныс олöмсэ мортыслысь, гудралэныс олöмсэ. Сыа öкеверт вööлэма важэн. 19-сянь сыа вошйэ вöляон вежа пöраыс, сэк рыт сыа рöбитны да пыркедчыны оз позь. Рöжествоыс рытэ, Василейсянь асылэ вошье, асынас сыа ветлалэ. Крещене асылас сыйэн ыллаысь нинэм оз позь пыртны кадитчан да мыйда вöльысь только, быссен гöгöр кадiтан, медланэ вежа пулякыс мунэ. Гöгöр кадитан мый выйым шкапьяс, тавсэ восьтэмен, чомйын олыген додьяс кöрьяс дзонен кадитан, кысь лымсэ пыртлан, лым гуяссэ быссэн кадитан.

Вежа пулякыс забыль вöлэма, да и энi на выйым.

Важэн кöрдор морт, кöрдорса оз веритчы сыйэ лёксэ карысьсэ. Корке сылэн кöрыс тор оротас пыр бöрэ кысь вöрзема сетче тойлас. Сэсся висьталэ этiя мортыс оз веритчы, нимнас веське айэ висьтолiс да, а сыа кöрторсэ тойлытэдь пырас öбесэдыс и суутас лата вылас дёля пася инька ныы и йöктэ сэтэн. Висьталэ сыа мыйке корас, а сыа оз веритчы – оз сет, висьталэ: «Он ке сет хэтьтэ мый, а надурита, хэтьтэ мый, а надурита».

Сэсся кöрсэ сылысь оротас да бöр тойлас кöрсэ. А кöрдорсаыс кадитэмен мунэ сэсся, кадитан – оз вермы сэтче пырны сэсся. Январ 19 лунас – Крещенеыс. Сэсся Великей пöстыс вошьяс. Пöс водзласдорас – Ыджыд видь (масленица), сыа мунэ 7 вежолын – Великей пост медводз вежолын сыа Серед пятница, бур народ и оз сёйныс, код верме, пятница -середасэ. Ме водзджык вермылi, а энi огджык вермы сiдз, а чери да мыйда он сей середа пятницаэ, ставнас сыйэ вежолынсэ он сёй чери. Сыа вежолыныс коле – мöд вежолыныс сыа чери сёян вежолын. Медводз вежолын пöст – страшнэй вежолыныс. Сизимед вежолын, бара важья народ четвергас сёясныс паскаас, сэсся нинэм оз сейныс. Ме водз Ыджыд лун пятницаас тожэ вöрзям и мый, тожэ иг сейлы.

Сыа сетэ,бöраке, важья моз ке пöстуйтны бура, кудз важэн пöстуйтэмась, здоровье мортыслы сетэ, организмаыслы. Кудз тайэ видь локтэ, мукедыс висьталэныс, видьнас сьöыд, ме сыйэ бура чуствуйта. Нёль видь восэ гöгэг нёльнансэ пöстуйта. Сыа мортыслы уна ортсалэ, желудокас ортсалэ, организмыс вежсе, сёяныс и быссен.

Ыджыд лун

Сэсся Ыджыд луныс воас. Вошйэ сыа медводз вежолынас. Четвергыс сыа Ыджыд четверген лыдзысе, праздник нин. Радольнича сыа пошти вежолыныс праздник. Ыджыд лун войсэ оз узьныс, витченыс сiдз. Кор сёясны, сэсся унмосьланыс. Мöдасылас миян бабе поконича, дьяк ныы вöлi да, висьталэ, мэдасылыс сыа Ыджыд лун. Сэк мортыс ыджыд лунас унтэм. А сiдз нэшта ыжда празднуйтэныс.

Гöтрасьысьяслы, мунысьяслы сыа лун бöр, позе гöтрасьны и вересса мунны. Ыджыд виде да виде абу гöтрасьлэмась, абу мунлэмась.

Мöд вежолуныс нин Ыджыд лун бöрас бара касьтысян, пöмина вежолун, четвергас – Родительскей лун, сэк родительяслы виде петэ и вежолын водз нылы виде пырэ. Виде пырэ суббета, а видьысь петэ вовторнике. Миян, визьлы, воскресенье лояыслы виде пырэ да видьысь петэ. Сидз сыа и мунэ.

Петыр лун, Пантелеймон лун

Петыр видьыс бара сiдз ветлалэ кор дженьыд, кор – кузь. Сыа бара виде пырэ, Петыр лунэ 12 июля видьысь петэ. Сыа видь выйым. Видьыс разнэй кор дженьыд, кор кузь.

Петров пöс сыа Ыджыд лун бöрыс ноолэдлэ. Кор Ыджыд лун бöрыс кузь – сыа дженьыд, а кор ыджыд лун бöрыс дженьыд – пöстыс кузь, Петров пöстыс.

Ыджыд видьыс вöлэма важэн 9 вежолын, народ топта пöстуйтэма и кулысьяс вöлэмась дажэ пöссьыс.

Важэн этiк ныы пöстуйтлэма сiдз топта 7 вежолынсэ ид вылын пукалэма. Сыа пöснэй сёян турунэ быдме, сылэн только куш сыйэ, никутшем рок, чери нинэм абу сёема, терпитэма.

Сэсся сыйэ пöссэ кык вежолынсэ янсöдöмась, августсэ тойыштэмась. 13 августэ виде пырэ, а 28 видьысь пэтэ. Видьысь петан лун сыа бара Успене ло. Сыйэ виде пырэм бöрас, 13 виде пырэ, 14 – Спас лун, сэксянь вошйэ пöсыс. Успене лунэ виде пырэ.

9 августа – Пантелеймон лун, бара пöснэй лун. Сыйэ народ важэн висьыген да мыйда дажэ кöсйысясныс. Если Пантелеймоныс ортсалас ке, сыйэ лунсэ оз сёйныс. Во кежэ или 3 во кежэ дажэ кöсйысеныс. И мортыс сiдз справиче.

Кöсйысем лунсэ проть нинэм абу сейны. Ва юан, ватэг морт оз вермы.

Миян кöрдорын да Пантелеймон сыа ортсалэ. Успене мöдасылыс бара Спас лун лыдзысе, сiдз арся видедь пöс оз ло. Арся видьнас бара пöс.

Важэн сьöкыд вöлi вöйна дырьясь, ой кутшем сьöкыд вöлi, зэй нин сьöкыд оонысэ вöлi. Кулысьыс вöлi тшыгсьыс и всякейыс вöлi, код изджык старатьчы, кодке старатьче кыське сё грамм нянь нажэвитны. Сэк кудзке дружнэ народыс олiсныс. Рöбещейлы 800 грамм, а бöрвы на сыйэ процент карисныс, иждевенецыслы 400 грамм, а бöрвы и 200 грамм карисныс. Колэ налог вылэ вурны да карны да сетны бесплатнэ сидз, зэй сьöкыд сэк вöлi, народ уна сэк тшыг кулi, сэк вэйна висьталан. Народ дружнэ олiс, хэть мый да сёрно нянь куска юкас. Энi народ оз дружнэ ооныс. Сэк морт мортсэ тöдiс, рöдсэ тöдiс, уважение вöлi.

Великей пост бöрас – Ыджыд лун. Сы водзлас дорас вöскресенеас бара виде пыран лун, водзджык вöскресенеас яя, оз позьны кутчы йö вежолун бара, ульлолас дор, йöлас дор позе сёйны, а медбöр воскресенеас – виде пырас сыа 7 вежолын кежэ.

Йöö вежолынсэ гоститченыс ёрта ёртныс дорэ ветлэныс, грехсэ прöститэныс грешник – грешничаэс, ёрта ёртныссэ проститалэныс вежолынсэ чöж.

Паскаас быссэн бура карасныс. Миян важэн чомйын ёлкаяс суутэдласныс, унаа ёлка суутэдасныс, чомйын олыген öбес дорэ топ ограда моз ёлкаыс, водз поме ёлка суутэдасныс, воччедасныс.

Сыа святэй пу ли мыйли. Если луньялан местэ праздникьяс лунэ кöр местэыс выйым ке, разсясныс и коляласныс. Образьяс дзонен быссэн мыськасныс, кор на светок выйым образ дорас гöгöр светок пуктасныс, вышывайтэм кычышканьяс да мыйда. Важэн асьныс вышыватьчылэмась.

Кöрдорын народ вышыватьчылэмась, бöрвы вурсемысь сёддор нинэм. Сэк войсэ оз узьныс. Витченыс. Вежолынсэ качачасныс, а виде пыртэдяыс бара йöö вежолыныс сэк бара ыслаласныс, чой карасныс да. Чомйын миян важэн ми дзоля дырьясьнум карлылiсныс качальяс – радольничаас, чойсэ – масленица.

Радольничаыс сыа – радуйтченыс, 7 вежолын пöстуйтiн да. Лойя синмен бара адзин. Висьталэныс, код радольнича дырья кулэ -щасливей морт. Сыа зэй ыджыд праздник энi, слабох, хэть вичкоын празднуйтны кучисныс, народ уна кучис пöнимайтны.

Пасха и быссен пöжалэныс, сыа шомес сдобнэй каран да пöжалан.

Паскасэ оз шаньгаэ пöжоныс. Сдобнэй шомес каран, форма ке выйым формаэн пöжалан, выытiыс кольк еджыднас майтан. Водз сiдз вöлi. Сыа важэн вичкосянь сiдз вööлэма важэн. Вичкоас пасканас мунан, воодчаас мунан рытнас службаыс сэтэн мунэ 12 часэдь. Войсэ он узь, сэтэн сулалан и гöгöртасныс хрестнас. Нуан сэтче сёян, кодлэн мый выйым: кольк сыа обязательнэ колэ, тшай и нянь и быссэн позе нуны. А колькыс висьталэныс сыйэ кольксэ колэ восэ гöгэр каролитны и оз шоммы сыа. Ме сидзь ачум видя, образ водзнырэ пуктан, сыа висьталэныс пö- жарысь дажэ каролитэ. Сыйэ кок улэ он чöт, водз тай эшын костэ крöшытлылi.

Мэдпэлэс гажэдчанлунъяс

Паска бэрас Радольничаыс праздник. Пöмина вылас сыа во вторникас рöдительяслэн кулэм лунныс. Сыйэ кудз Ыджыд лун празднуйтэныс, мöгыла вылэ калылэныс сэк: паска катан да кольк катан мöгыла вылэ. Касьтэдьяс ёрта ёртлы сетэныс. Родительскей луныс, виде пыран родительскей луныс сыа суббета вежолын водзджык виде пырэ. Сэк баражэ блин кисьтан да суседьяслы сеталан.

Важен тав ыджыд праздникьяссэ изьватасыс пасйис. Паска – сыа Ыджыд лун и нимыс, Рождество, Хрещене, Василей сыа тавыс ыджыд праздник лыдзысе. Видьнас на 7-го апреля Благовещене лун. Медбöр виде пыран вöскресене бара верба вöскресене. 30 марта – Эликсей луныс, тожэ праздник. Весьтас ке висьтоны, ставыс ыджыд праздник, вöскресенеыс тожэ ыджыд праздник. Миян айэ пыр сыйэ висьтолiс.

Иван луныс, Петр луныс, Прокопей луныс – тавыс ыджыд праздникьяс. Чомйын сыа ыжда ворсэмась. Миян на дедэлэн ним луныс вöлi, сэк бур местэ вöрзясныс да, дядьяс быссен гармонеэн ворсиэныс, этiк только из куж ворсны. Мамеяс, тьöтэяс, бабеяс сьыны кужисныс, ворсасныс да. Мый, кöнке, кужисныс быссен сьылiсныс.

12 юле – Петыр луныс, 21 юле – Прокопей. Прокопей луныс сыа кöрдорсаяслы зэй ыджыд праздник. Прокопейэдь вотча важэн кöрыс лёке усьлэма, а сыйэ войсэ колэ Из гöра вылын кöрсэ видьны, турун вылын оз ко видьны. Турунсэ сёяс вермас кöрыс, энi кокалэныс.

Ворсисныс код мый кужэ, код сьылэ, код ёрта ёртас ветлэ. Важэн ёрта ёртас зэй ветлалiсныс, этiк праздник этiк дорын, мэд праздник – мöдыс дорэ воласныс. Ми быдмим да миян ай мамьяснум если ны дорэ мунэныс, нылэн ныыяс бара ми доранум воасныс. Нылэн ай мамныс ке мидоранум воас, ми бара дадь босьтам да ны дорэ этiкла чукарчам, челядьыс пыр этiкла чукарченыс. Висьысьыс висис, кулысьыс кулi, но кудзке народ дружнэ олiс. Энi проч оз дружнэ ооныс. Уна винаыс лойи, мед бур мортсэ мед лёке карас.