...
Бара видлала аслам киясöн.
Олöм гажöдысь дона ёртъясöс
Бара казьтыла мелі кывъясöн.
Югыд синъясас визув олöмлы
Йöзкöд öтвылысь сюся видзöдла.
Майкöд быдлаö кöсъя волыны —
Паськыд му вывсö медым мичмöдны.
Самолёт вылö талун сöла ме,
Лэба — кузь туйсö ог и казявлы.
Гажсö тулыслысь босьта сьöлöмö,
Йöзкöд öтвылысь кута гажъявны.
Майыс тэрмасьö, менö тэрмöдлö,
Тувсов шондісö зэв водз садьмöдö —
Мусö сюсьджыка быттьö бергöдлö,
Олöм-вылöмсö йöзлысь ладмöдö.
Василий Власов.
Бара тулыс
Бара Войвылö юсьясöс кыскö.
Бара косьясын ворсöдчö ком.
Ловзьысь вöр-васö небыд зэр мыськö.
Гöгöр кажитчö мича да том.
Кывтö ю, быттьö олöмыс кывтö.
Зэвтчö лун тöлöн енэжлöн вон.
И став ловъялы эскыссьö кывтöг,
Мый оз ло тайö олöмлы пом.
Пётр Бушенев.
Видза олан, гажа тулыс!
Видза олан, енэж шöр!
Видза олан, югыд шонді!
Видза олан, ловзьысь вöр!
Видза олад, помтöм видзьяс!
Видза олан, кöдзöм му!
Видза олад, еджыд кыдзьяс!
Видза олан, визув ю!
Видза олан, чужан муöй!
Коми войтыр, видза ов!
Мед пыр шудлун тіян туö,
Кыпыдмö да югзьö лов!
Александра Мишарина.
Гора тулыс
Сёйтöг овны позьö,
Сьыланкывтöг — оз!
Бара кыскö водзö
Гора асывводз.
Кыдзи чужö, кыла,
Пуяс костын тöв.
Мыйла, дона нылöй,
öтнад олан чöв?
Талун ставыс сьылö:
Парма, ыб и ю,
Дзоридзьясöн тырö
Миян чужан му.
Öтвылысь вай кывзам
Налысь мелі гор,
Татшöм сьыланкывйыс
Некор мед оз ор!
Серафим Попов.
Кор войвылö матыстчас тулыс
Да пармасö юкталас зэр,
Руд каля Печоралысь-юлысь
Оз вудж синмöн сывъявтöм эрд.
Лöз море моз паськалас сійö,
Уралöдз кöть веськыда кывт;
И быдлаын öзйöны бияс
Да юралö выль сьыланкыв.
Эм му вылас зэв уна юяс,
Но сöдзджыкöс корсьны он куж.
Лöнь Волгакöд öти кузь туйын
Печоралöн öтувтчас шуд.
Ме ассьыным чужан му сьыла,
Выль кыалысь кыпöдчан мич.
Руд каляяс лэбöны ылö
Да сы йылысь нуöны висьт.
Серафим Попов.
Менам тулыс
Меным колö сэтшöм тулыс,
Медым вöлі зэр и гым,
Медым радліс енэж улыс,
А эз вуджрась кöдзыд лым.
Меным колö сэтшöм тулыс,
Медым кыпыд вöлі лов,
öшиньöдз мед Эжва туліс,
А эз гожся ваöн ов.
Меным колö сэтшöм тулыс,
Кор тай киын узьö ки,
Кор тай зараватö юлам
Кыддза расын тэкöд ми.
Меным колö сэтшöм тулыс,
Коді гудöка и пом,
Окасян кор льöм пу улын,
Кор тай тулысыс кодь том.
Василий Лодыгин
Полярнöй Урал бердö тулыс
Эз кöръяслöн сюр вылын кывт.
Веж коръяссö нэриник пулысь
Друг казяліс ичöтик ныв.
Том бадьяссö вайисны арын,
Кор тундрасö мыськаліс зэр,
И медводдза тайö бульварыс
Посёлокö пыртіс выль сер.
Но ичöт ныв быдöнысь шуда
(Ме радлунсö сылысь ог торк!),
öд первойысь аддзö, кыдз чужö
Да паськалö тіралысь кор.
Лёк турöбъяс кынтасны мусö,
И зэркöд тшöтш кучкалас слöт,
Но некод нин, некод оз гусяв
Том сьöлöмысь медмича вöт.
Серафим Попов.
Тулыс воö…
Муркöстіс медводдза гым,
Чардби друг енэжсö орöдіс.
Няйт пиö вöйöма лым,
Тулысыс ас йывсьыс горöдіс.
Туй вылын гожъялö гöп,
Енэжыс бара на письтöма,
Мездмöма йöртöдысь лöп,
Нюмъялö-вашъялö мисьтöма.
Пуясын мыччысьö кор,
Вежöдö ывла выв, мичаммö.
Варовмис ичöтик шор.
Му вылыс лым-йиысь личаммö.
Александра Паршукова.
Коми листбоксö лэсьöдiс: Ирина Терентьева.
Снимокъяс: Татьяна Паршукова.
