Ирина Канева Горкиысь шöдöдiс медча ыджыд водясьöм – выль машина
Сентяб тэлысьын бöрйысян лунъясас «Уютный Ямал» проект нуöдiс викторина. Вöлi разöдöма уна водясьöм и медча ыджыд водясьöмöн вöлi выль машина. И сыйö, лотерея моз, шöдöдiс Ирина Алексеевна Канева Горки сиктысь: «Ме вöлi Салехардын, Галина нылö дорын и другысь воис смс-ка телепон вылам. Нылö лыддьис и кучис горзыны «Маме, тэ машины выиграйтiн», ме иг эскы, татшöм оз оллы. Но кудз петкöдлö олöм, оллö быдторыс, медшöр, веритны!»
Ми тöдмасим Ирина Алексеевнакöд да тöдмалiм «кутшöм нö кийö» сюри водясьöмыс.
Вермысь рэдитчöма чомйын Пур ю вомын 1948 воын март тэлысь 27-öд лунö. «Айö, Айваседо Алексей Львович, да маме, Марина Семёновна, ветлалiсныс кöрдорын. Айö – Ямалса яран, но сёрнитiсныс Изьва кылöн. Мамелöн ай-мамыс, Семён Васильевич да Ирина Алексеевна, кöрнаныс воöмась Пуровскöй районö Берёзово районса Нялимово вэлэсьтысь 1931 воын. Маме да айö аддзисисныс Самбургын кöрдорсаяслöн гаж вылын. Айö сэк дадьдяс пыр чеччалöма и мамелы зэй лэсялöма, мый сыа дюж да крепыд. Локтöма Семён Васильевич дедö дорö да шуöма, мый верессайö петö. Сыдз и олiсныс, нёль челядь быдтiсныс» – казьтылö челядьдырся кад помлась Ирина Алексеевна.
Миян ёрт семьяын шэркос челядь и сыдз артмылöма, мый кор ай-мамыс вэлэсьтэ лэччылымась, Иринаöс пыр чомйö кольлöмаöсь Адко дядьыскöд: «Чомдор – тайö вöлi школаöдз став менам мирö. Помнита колим ми Адко дядькöд кыкöн чомйын да мунiм кычегö дадьöн. Сыа менум мальча кышöд водзам чöскыд калач тэчис, сыдз и сёйи туй чöж. Нинöм сэк нöшта из коо и зэй уна шуд вöлi».
Школаö Ирина Алексеевнаöс сёр айыс сетöма, абу мöдöма лэдзны ас дорсьыс. Велöдчöма Самбургын кöкъямыс классöдз да дас сизим арöн школасö эштöдöма. «Школа бöрын мунiм Таня Русакова одноклассницакöд Тобольскö велöдчыны. Ме мöдi штукатур-маляр вылö велöдчыны, но зрение серти менö сэтчö из босьтныс. Сэк öтик тöдса ныы шуис, мый Дубровнаын позьö велöдчыны тракторист вылö. Ме казьтi, мый коркö витöд классын велöдысьлы шуи, мый мöда лоны трактористкаöн. Зонъяс сералiсныс, а велöдысьнум шуис, мый менам ставыс артмас. Сы казьтылöмнас и мунi велöдчыны» – люмпыр висьтолö миян ёрт.
Велöдчис Ирина Алексеевна бура – дöска почёта вылын югъялiс. Кор воис Самбургö практика вылö, ставыс дивутчисныс сяма ныы вылö, зонъяс из нин серооныс. Неуна рэбитiс да бара велöдчыны Салехардö пырис библиотекарь вылö. «Кор поступайтiм, шуисныс сьыыны кутшöмкö сьыланкыы – ме сьылi кутшöмкö революционнöй сьыланкыы. Сералiштiсныс ме вылам. Мöдасы лунас чукартiсныс став библиотекарь вылö поступайтысьясöс и шуисныс код кучас велöдчыны. Менö и нöшта морт дас из шуныс, висьталiсныс мунны директор дорö да сыа ставсö висьталас. Ме медводзын мунi. Директорыс из вö, пукалiс сылöн вежысь и миян петiс сёрни: – Ми тiянтö босьтам Хоровое пение вылö.
– Ме ог мöд, ме мöда библиотекаын рэбитны. Он кö босьтö, сичкö ме муна керкаö.
– Видзöд, босьтам тэнö кытчö мöдан, но видзöдлам медводз тэлысьсö кö бура велöдчан – колям, он – мунан керкаö» – казьтылö Ирина Алексеевна.
Велöдчöм эштöдöм бöрын ыстöмась миян героинянумес ылыс войвыы вэлэсьтö – Находкаö. Уджалöма сэн во олöма да локтöма бара Салехардö, Коломникова Нина Михайловна дорö, мед бара ыстiсныс рэбитны. Ыстöмась Казым-Мысö библиотека восьтыны: «Ме рэбитi сэн нёль во. Менум зэй лэсялiс – мича яг, авъя йöз и вэлэсьтыс вöлi ыджыд. Библиотекаыс вöлi сиктлöн сьöлöмшöр. Ставыс лыддьысисныс».
Некымын во мысьти тöдмасис вересыскöд, Канев Василий Митрофановичкöд, да мунiс ооны Горки сиктö. Быдтiсныс куим челядь: пи да кык ныы. Горкиын Ирина Алексеевна бара пырис рэбитны библиотекаö. Челядькöд уджалiс 13 во. Вересыс пыр быдöн ортсалiс: «Миян пыр уна гаж вöлi и мед корны йöзсö рисуйтiм тематика плакатъяс. Менум пыр Василий рисуйтiс. Сыа зэй енбия вöлi, и кыыбуръяс гижис и мойдъяс висьталiс».
Важен нинöм из вö дась и став сценарийсö да гажъяссö колiс аслыд думыштны. Ирина Алексеевна пыр став вынсö сетлiс уджыслы.
1987 воын миян ёрт лоис библиотекаöн заведующейöн и пенсияöдз сэн и рэбитiс: «Вöлi зэй дельнöй. Ме ветлалi сикт кузя, тöдмаси йöзкöд, сёрнитö, коралi миян мероприятиеяс вылö. Лыддьысьысь пыр уна вöлi».
Ирина Алексеевна тракторист вылö велöдчис, а машинаöн ветлооны из. Сыйöн водясьöмсö сетiс Александра нылыслы: «Ме сыа велöдчас да менö и нолöдлас, кор колö. Ме зэй рад, мый выйим татшöм позянлунъяс – вермасьны и выигрывайтны».
Машинаыс бур кийö сюри и ми кэсъям Ирина Алексеевналы крепыд дзоньвидзалун да радлун, став бурсö да югыдсö.
