Сентяб тэлысь помын Салехардын чукартчисныс медча енбия коми челядь
“Изьватас” öтмунöм коймöдысь нуöдiс регионса коми челядь костын “Мада дзолюк” ордйысьöм. Таво Ямалса изьватаслöн юралысь Валентина Иосифовна Шахова “Мада дзолюк” проектöн петiс Президентлöн грант вылö и вермис. Сьöм судзöдöма – колö дасьтысьны.
Лэсьöдчыны ордйысьöм вылö кучисныс тööнас на, мöдiсныс нуöдны тулыснас. Но локтiс лёк висьöмыс и миянтö ставсö йöртiсныс керкаяссö. Мöдан кö лоас!
Со и “Мада дзолюк” лоис! Сентяб 26-öд лунö чукартчисныс дас кык челядь Округса войтыръяслöн культура шöринын: Геркогло Полина да Вова Соломатов Мыжыысь; Халиулина Дарья, Чупрова Вика да Лена Созонова Горкиысь; Канева Дарья да Попова Полина Харсаимысь; Витязева Лена да Филиппова Лера Белоярысь; Терентьева Даша, Лиза и Маша Витязевъяс Салехардысь.
Ставыслы сизим арсянь дас кыкöдз. Изьватас кылöн бура сёрнитöныс ныысь некымын морт: Лена, Маша, Лиза Витязевъяс да Даша Терентьева. Мöдъяс оз кужныс сёрнитны, но зэй мöдöныс и велöдöныс изьватас кыысö. Югъялiсныс, тайö лунас, из куш мича паськöмъяс, но и синъяс. Тыдалiс, мый став челядьыс зэй радейтöныс чужан кыннысö. Сыа и бур, кор аддзан татшöм челядь сьöлöмтö бусьтэкö выйöн майтöныс. Бöр бергöдчам ордйысьöм дорö.
Сентяб 25-öд лунö рытнас челядьяс медводз тöдмасисныс ёрт ёртныскöд. Воисныс репетируйтышны да вурны мöдасы лун кежö звер-аканьяс. Миме аддзысныс ёрт ёртныскöд öтик кыы да гажаа шöралiсныс-вуралiсныс аканьясныссö. Тöднин, висьтолiсныс, мый петкöдлiсныс да мыйысь полöныс.
Сентяб 26-öд лунö асыы водз локталiсныс Округса войтыръяслöн культура шöринö, мед мичаа пасьтасьны, баситчыны да неуна полöмторъясныссö чинны.
Дас кык час – ордйысьöм вощис. Гажсö восьтiсныс «Обдорянка» сьылысь котыр «Мада кыы мед пыр кылö» сьыланкылöн. Гажсö нуöдысьяс, Терентьева Ольга Владимировна да Терентьев Александр Алексеевич, сетiсныс восьтан кыы Валентина Иосифовна Шаховалы: «Аттьö тiян, мый воиныд да лэсьöдчинныд татшöм сьöкыд ордйысьöм вылö. Ме кора тiянöс поддержитны миян челядьяснумес, ныа эча полöныс, вед тон нылы коомас уна по петны тайö сцена вылас». Ми и радöсь поддержитны! И радпырысь воисныс чолöмооны коми йöктöмöн «Ябереги Нумги» челядь котыр. Югъялiсныс-йöктiсныс «Коми муын» сьыланкыы улö.
Бур кыыяс шуисныс, сьылiсныс и йöктiсныс, пöра нин ордйысьöм вылö вуджны. Медводз конкурсöн вöлi «Видза оланныд!» видеоролик-визитка. Сэн челядьяс шуисныс ас помласьныс, оланин, семья да радейтан делояс помлась.
Сыдз ми тöдмалiм, мый Лера Филиппова велöдчö медводз класстын да радейтö серпасасьны. Даша Каневалы тшöтш сизим ар и сыа радейтö сьыыны да йöктыны. Вова Соломатов из вермы воöдчыны Салехардöдз, но быд конкурс заданньö вылö ыстöма видео. Медводзас шуис ставыслы, мый зэй радейтö ортсасьны айыслы да ветлö кудо секция вылö. Полина Харсаимысь из жэ вермы воны, но ми видео пыр аддзим, мый сылы сизим ар и сыа велöдö изьватас кыы бабыскöд. Салехардса Даша шуис, мый лоöма колян «Мада дзолюкын» медча енбияöн, а öнi быдмыштiма, юрвемсö топыдыштöма да бара локтöма вермасьны. Даша нин велöдчö витöд класстын, а Лена Белоярысь квайтöдын классын: «Ме радейта изьватас кыы, мыля менам мам-айö ветлалöныс кöрдорын и тайö миян чужан кыынум». Мыжыысь Полина дас кык арöса, изьва кыысö велöдö школаын да Анна Модестовна бабыскöд: «Ме сьылы да йöкта квайт арсянь нин. Радейта ворсны театрын да ордйысьны конкурсъясын». Витязева Лиза велöдчö нёльöд класстын ас видеоас петкöдлiс кудз лэсьöдчис конкурс вылö да кудз видзö аргыш гожöмнас чомйын. Окмыс арöса Даша Халиулина петкöдлiс кудз ветлалö робототехника кружок вылö да мичаа сьылö. Горкиысь Вика бара жэ мичаа сьылö да радейтö ворсны дзоля чойыскöд. Маша Салехардысь висьтолiс кудз чомйын ветлалö чери кыйны да вотчысьны, а керкаын рисутчö да снимайтö «Тик-Токö». Лена Созонова помлась висьöныс Горкиса квайтöд класс: «Лена, ми тэкöд! Тэнад ставыс артмас». Тöднин артмас, вед Лена и сьыылö, и ортсасьö мамыслы кукань да чипан вердны.
Мöд петкöдчöм вöлi «Ме сёрнита изьватас кылöн» конкурс. Челядь петiс сцена вылö, экран вылын вöлiсныс серпасъяс, нылы колiс висьтооны, кудз тайö кыыясыс лоасныс изьватас кылöн: песок – лыа, куропатка – байдык, топор – чер, крыльцо – сод, веник – гэлих. И уна мукод кыы. Ставсьыс бурджыка кыыяссö висьталiс Маша Витязева.
«Югъё и кыпедчы менам чужан муö!» конкурс заданньöын колiс висьтооны презентация ортсöгöн, сикт помлась либö кутшöмкö историческöй лоöмтор помлась. Лера Филиппова да Даша Канева вистолiсныс Белоярск сикт помлась. Дарья содтiс аслас дед-баб помлась, кодъяс пуктiсныс пай ыджыд тышын вермöмлы. Дарья Терентьева висьтолiс Терентьев купеч усадьба помлась, кодсö неважен реставрируйтöмась и сыа лоис музейöн. Лена шуис аслас чужан Горки сикт помлась. Полина Геркогло висьталiс Мыжы сикт помлась да содтiс: «Ме ола Мыжыын. Ми ставыс тöдам Мыжы помлась унатор. А öнi, ме предлагайта тiян кызышны сыдз, топсе тi никор ин вöлö Мыжыын, но тiян дельнэй сы помлась тöдны».
Халиулина Даша сьылiс Горки помлась сьыланкыы да шуис сылöн мича нинъяс помлась. Салехардса Лиза висьталiс Обдорский острог помлась, а Маша ыджыд Салехардса мамонт помлась. Полина Попова ыстöма презентация Харсаим помлась, а Вова Соломатов видео пыр висьтолiс Иван Григорьевич Истомин помлась и раскажитiс «Я люблю езду такую…» кыыбур.
Челядьяс петкöдлiсныс ассьыныс енбиялунсö «Ме радейта чужан кыы» конкурсын. Лера лыддьыс «Ар» кыыбур, а Даша Канева Иван Куратовлысь «Коми кыы». Вова петкöдлiс ставыслы «Код кудз сьылö» сьыланыыкойд кыыбур. Даша Терентьева сьылiс “Гожся сьылынкыы”, а Мыжыса Полина “Коми муын”. Горкиысь ныыяс Лена да Вика кыыбуръяс высьталicныс, а Дарья сьылic “Ен да бур йöз”. Лиза казьтiс Вениамин Чисталёвлысь “Аръявыы” кыыбур. Марья Витязева Татьяна Кирпиченколысь “Авъя лэбач коми кыы” кыыбур расскажитic, а Лена ассьыс гижöма кыыбур “Жалькойд изьватас кыы”.
«Ветеранлы открытка» заданньö вылö челядьяс ставыс карöмась мичасис мича открыткаяс и гижöмась шоныд кыыяс, визьлöг вылö:
Дона ветеран!
Аттьö, мый ми олам.
Аттьö, мый миян сöстöм небеса.
Аттьö, мый ми öнi нинöмысь ог полö.
Аттьö, мый ин тöдлö дышöдчöм, а уна каринныд страна кыпедчöмлы.
Аттьö, мый ин сдаватчö, а пыр видзöдiнныд водзö.
Аттьö, мый радейтанныд олöм и оланныд югыд синмöн.
Аттьö, мый тi выйöмöcь!
Ми видзöдам да велöдчам ооны сыдз жэ.
Сиптiсныс ордйысьöмсö «Сяма ки» конкурс петкöдчöмöн. Инсцинируйтiсныс Татьяна Власовна Гостюхиналысь «Кудз теляыс корсис ёртъяс» мойд. Сыйö тi верманныд лыддьыны дас нёльöд листбок вылын да видзöдны сэтысь снимок.
Конкурсыс мунic кык часысь выытi. Жюри, Валентина Ефимовна Елобаева, Ольга Константиновна Ендырева, Татьяна Власовна Гостюхина, дыр сёрнитiсныс ас костаныс, решайтiсныс кутшöм челядь кутшöм номинацияын вермысьöн лои.
Став челядь босьтiсныс ас ним да уна мича козин. Аттьöалам челядьяслысь баб-дедъясныссö, мам-айясныссö, чой-вокъясныссö да коми кыы велыдысьяссö, мый ортсалiсныс лэсьöдчыны ордйысьысьяслы.
Чолöмалам, радлам и нимкодясям миян енбия коми челядьöн. Мед водзö велöдасныс коми кыы да петкöдласныс асьнысö!
