Там ӆапатан вуӆэт Мужи вош хорсты хара воштасаят
Ӆапат оӆаң хатаӆн хутмет тащ МСП «Мужевское» хорты тащ Мужи вош пеӆа воштасэӆ. Щи еӆпи таӆаң тащ ӆуңатса па пирыса маты вуӆы нох хорты мосаӆ. Тампуш вуӆэт туняӆ эӆты вояңшакат па нёхэӆ ямшак. Ӆуңал ям па ёлах уӆмаӆ – щит вуӆы ӆэты па энамты меет ям пора.
Хорсты кеша нэман хоятат рупатая вусаят. Ӆув леккар хотан леккаратн ванстаят па веӆщи рупатая эсаӆсаят. Ӆув таӆаң хатӆ хорсты лотн рупатты питӆат. Щита нэман рупатты хоят ӆэтот кавартаӆ па щита рупатты ёх шай инщӆан. Рупата яма верман уӆ – кашң хоят ӆув верӆ яма уйтӆаӆы. Сишн рупата йи лотн ант ӆойӆ па сора манаӆ. Хоӆна веет тащ мосаӆ хортыя.
– Хутмет тащ эӆты сот ветьяң молтас вуӆы хорты масса, – ястаӆ МСП «Мужевское» куща Алексей Викторович Шубадёр. – Щи тащ меет хувн уӆ, Щаня пеӆа. Сишн таӆаң хуӆам хатӆ воштысаят муң пеӆаев. Хорам нёха мохты вуӆы леккаратн вантӆа па потаӆтаӆа. Хун иса нёха вантӆа па веӆщи ӆувеӆ тыныты ӆапкаят эӆты питӆув.
Тапмуш вуӆы нёхай и киӆа сахат 350 соӆкува питаӆ. Туняӆ эӆты шеек ар антом. Йи тащ хорӆа па мохты кимет тащ туӆа хорсты ураңна. Щиты таӆ соханты унты рупатты питӆат. Меет ёӆта олаңмет тащ хорты питӆа. План щирн 35-50 тонна нёха маты утчиӆат.
