Ԓорвош районэвн уԓты хоятат, хой вуԓы энмаԓԓат, хуԓ веԓпасԓат па ай куртатн уԓԓат нётопсайн митыԓаԓаят
Хоятат, хой вуԓы тащатн рупатԓат, хуԓ веԓат па ай куртатн уԓԓат, вератԓат нэпек ханшты па нётоп пормасатн митаԓыԓаят. Щи щирн кашаꜧ куртан специалистат уԓԓат, хой хоща рахаԓ документат пиԓан ёхатты па заявление ханшты.
Щиты кашаꜧ хоят единая информационная система «Ямал» хоща ханштаԓаят. Па ищи щи лотан рахаԓ мосты пормасата заявление ханшты. Щи ханшам нэпекат Мужи вошн вантԓаят па кашꜧ пормас щирн очередность верԓа. Очередность ханшам хатԓ, тыԓащ па таԓ щирн ԓэщатԓа. Хой оԓꜧашк ханшас нэпек – ԓув оԓꜧашк мосты пормасԓ ёша пайтԓаԓы.
Щиты мосты порамаст кутан: парщин, нуй, нюки, карты кур, сохԓат – иса муй мосаԓ хот ԓонщты ураꜧна – щимащ нётоп кочевой хоятата маԓа. Картэт, ԓартты картԓуꜧкат, кев-курат па сохԓат – щи нётап полукочевой хоятата, хой хуԓ веԓпасман ай куртатн уԓ. Щи тумпина кашꜧ семьяя рахаԓ юх эватты па тут машнаят ԓутты, па ԓутом отԓаԓ чекат пиԓн заявление ханшты па посатом охԓаԓ ёхԓы сохаптыԓаят. Щи щирн нэман лимитат верман уԓԓат: юх эватты машна ураꜧна – 16640 соԓкова, па тут машна ураꜧна – 17160 соԓкова. Щаԓта кашаꜧ семья тут машная понты тут-йиꜧк ԓутты ураꜧна кашꜧ таԓ ԓапат щорс соԓкова ох митаԓыԓа. Щиты туняԓ, хащам таԓн 344 семья охан ёхатсаят.
Хоԓна хащам таԓн парщин 21 семьяя митаԓам, кожа (сыромять) – 33 семьяя, тут хошапат – 141 семьяя, хот ԓоꜧԓа понты карты – 59 семьяя, ԓартты картԓуꜧкат – 66 семьяя, хуԓ веԓты хоԓпат – 67 семьяя, сохԓат – 41 семьяя па портун аптечкаят – 83 семья.
Тампуш очередь щирн айнайн хоятат еԓԓы мосты пормасатн митаԓыты питсаят. Куртаꜧ хоятат ёхтыԓыԓат пормасԓаԓ ураꜧна. Щиты там ԓапатн кат хоят, Овоԓаꜧ па Мувкурт эԓты ёхтыԓыстан. Юрий Иванович Куртямов пенсияя этас па сэма питам па энмам куртаԓа уԓты манас – катра иты, опращԓаԓ иты уԓты питас. Ин ԓув сохԓат вуты ёхтыԓыяс.
– Ма ин Овоԓаꜧ куртэмн уԓԓам, щита сэма питсам. Уна пелка питсам па самемн энмам мувема таԓԓаям, – ястаԓ Юрий Куртямов. – Ма нумастэмн там шеек ям нётопса, аԓ маԓаян, муя ат вуты. Манэм муй арат рахаԓ, щитэм вуԓэм, ашнаԓ манэм ант мосаԓ. Пумащипа ястаԓам Ямал мувев пеԓа, тамщ ям нётопн верԓаюм. Кимет муватн там иты шоши хоятат воԓаꜧ ант нётԓаят.
