Тампуш Екатерина Ивановна Лонгортова (Сандрина) сэма питам хатӆ эӆты нийӆъяң таӆ поснтаӆ

Энмам мувӆ Муши вош пеӆа уӆ.Катра кев авт курт лепн хоӆна айшак куртые уӆ. Щит Вуюв курт. Щита ӆув хоята йиты питас. Ӆув уӆмаӆ хуват ар таӆ Кевн яңхас. Щи тумпина хуӆ веӆман па вус.

– Муң ай порайн ащев парс. Муң няӆ няврэм ащиӆы хащсув. Айшак апщем, Феня, йи таӆ моӆтас. Сишн ащев пиӆн Кевн воӆаң яхмев антом. Нык хащсув, намн энампсув. Ун ащевн энмаӆсаюв, – нумаӆмаӆ Екатерина Ивановна. – Яйем, Роман, па нийӆ-яртьяң таӆ ӆоват, акайӆаӆн Кева туса. Ванты, шоши вуӆыӆув ищи шавиты мосмаӆ. Щиты пора хащас, уӆтэв эӆты ашкуӆая вусаюв. Интернатан вусув.

Щиты Катя Сандрина вет-мет класс унты утаӆтыйс па ёхи вуса. Сикуш утаӆтыты ям па ёӆн нётты хоят ищи мосас. Ун ащеӆ хуӆ веӆпасты ху уӆмаӆ, бригадира рупатмаӆ. Ай эвие ӆувеӆ нётмаӆ. Рупата ар.

– Хуӆ пиӆн рупатман вусув. Тохи тутӆисаюв, поӆ вериӆысув. Щиты поӆн вошсув – сух, вуш па мохсаң артан мощатысув. Пора сора хащӆ, сус пора ёхатӆ – щохар веӆӆув. Па ищкияшк йиӆ, паннэ веӆпасӆув. Щиты щи тутӆиӆаюв, – потарӆ Екатерина Лонгортова. – Йи унашк йисам, хоятат пиӆан яңхӆам, ӆоваӆӆам.Щиты Кантюр посӆ эӆты Муши вош унты иса ӆоваӆман рув па пеӆңа кутн хуӆ таӆӆисув. Ун аңкем па аңкем хуӆ пущкаята соӆтӆат. Ма па нянь ураңан Муши унты яңхӆам.Юхатшак ай моторат этсат. Рупата кеншак питас.

Щиты Екатерина Ивановна энмас. Унашк ювмаӆн торн верты тахая вохиӆыса. Кат ӆуң торн сэврас. Щаӆта щи юпина Щаня мува ху сая манас. Щита ӆув 1963 таӆ эӆты вуӆы тащ хотатн рупатты питас.

– Туп суса йиӆ, вуӆы хорты хот хоща вуӆэт нёхия хорӆайт. Хуӆмсот-кемн мохты хорыӆыса. Щи нёхайт, щаӆта, муң ухаӆн Муши вош пеӆа, таӆисӆув. Ёӆта кашң хоят кат пуши ухаӆ тайӆ. Вош пеӆа ванамаӆа па ат хоӆӆув, антом-ки, апн нёхайӆув ӆэӆайт, – ястаӆ Екатерина Ивановна. – Шай кавартӆув, термос мутрайт щи порана антом. Потам хуӆ ӆэӆув. Ӆонщаң аплака курӆув вортӆыӆув сах кутпат унты, щиты еша воймтыӆаюв, оӆӆув. Аӆаңсахат, туп новия йиӆ па еӆӆы ӆэӆапӆув. Мушия ёхатӆув. Хуӆӆув, нёхайӆув, хой ишн ампара муң аӆӆиӆув. Хус киӆа суюв нэңат аӆ аӆэмиӆат. Щиты кат-хуӆам таӆ яңхиӆысув. Хой таӆатн нык хащиӆысам, щаӆты па Кева яңхиӆысам.

Няврэмӆаӆ еша унашак ювм юпина, Екатерина Ивановна Овкурта охӆас. Щита няврэмӆаӆ садика масӆы па ӆув ищи щита рупатты питыӆыяс. Вошн уӆман аршак ёнтасты питас. Тайты сох ар верты мосаӆ: моӆщаңат, сахат, порхаят, тупрат па ваят.

– Веранты-ёнтасты мутра ар, рупатаяң. Меет оӆаңн ямашак сох мосаӆ. Сох хорты пораян нэ ёх пиӆан яңхаӆ, аляӆ муй хорпи ӆувеӆ мосаӆ: хорамаң нёпӆув катаӆӆа, ёшн вантӆа, ӆуен паӆат пуныеӆ-ки, еша нох этаӆ-ки, щит ям сох. Пон тахтэӆ ищи ям пуӆяң август тыӆащн хорӆа. Щи юпина сох яма сораӆты мосаӆ: хот ула нох таӆты, ат яма пусаңн пошӆа, – потарӆ Екатерина Лонгортова. – Ям сах-ки верты, хуӆам нёпӆув манаӆ, пон-тахтэӆ, щаӆта пушаӆ, аратӆ ӆапат-кем сох. Иса ӆувӆаӆ яма нох татаӆты мосӆат па саха ӆэщатты. Ханшеӆ уш кум шитман еӆпашк каратты мосаӆ. Щиты сорашек таӆ пеӆа, ищкишк хатӆат пеӆа етшаптаты рахаӆ. Щи тумпина вай кепӆат татаӆты ищи мосаӆ кум шитты.

Щиты ӆув уӆтаӆ хуват ар тайты сохат ёнтас. Ӆуңатты-ки питӆэң ёшн ӆуй ант тармаӆ. Ёнтыӆыйм сахӆаӆ ар муватн мир ӆоватн уӆӆат. Йи сах Бельгия нэмпи мува тувам. Щаӆты Финляндияян катӆэм сахӆ уӆ.

– Сорам Асовн хуӆ веӆман уӆтэмн, теплоход туристат пиӆн ёхтыӆыяс. Яӆап сахэм тынысэм, Эстонияя туса. Щи тумина похем ай порха, молщаң па нюк-вайт, хоӆ иса вусайт. Ветӆэм сах пи кимет ун вошата тусайт, ат па нумӆэм маты тахаята, – потарӆ Екатерина. – Нуй сахт па артан вуйӆысаят. Ханты-Мансийск вошн ӆутыӆысаят. Финляндияя няӆ-кем нуй сах матсат. Пуӆңаватан па тайӆаят па ар тахаятн. Таңха ӆув ванты па тайты мосӆат.

Вуювкуртаң нэ Екатерина Ивановна, хоӆна муй арат вератӆ, самаңа тайты ёнтасты верӆ еӆӆы туӆӆы. Няврэмӆаӆа, хиӆыӆаӆа, хиӆыхиӆыӆаӆа па рутӆаӆа мойӆапсаят тус ёшӆаӆн ӆэщатаӆ. Ин па там 2023 таӆ яӆаптаӆ тыӆащн 23-хатаӆн ӆув мойӆапсаятн мойӆаӆа. Няврэмӆаӆ па рутӆаӆ иса ияха хорамаң тэӆаң пасан сурыйн ияха акатӆаӆы! Еӆы ат тумтака уӆ па Най уртн ат шавиӆа!